د لاس رسي وړ اتصالات

په افغانستان کې د واټرپولو د ورزش د ودې لپاره هڅې


water polo

water polo

د افغانستان د واتر پولو فدراسیون د دوو امریکايي روزنکو په همکارۍ په کابل کې د واټرپولو د ورزش لپاره روزنیز پروګرام پیل کړی دی.

ددغه روزنیز پروګرام هدف د دیارلس تنو غوره لوبغاړو موندل دي چې په نږدې راتلونکې کې به د امریکا متحدو ایالتونو ته د لا زیاتو تجربو ترلاسه کولو په هدف هم سفر وکړي.
‪په افغانستان کې د واټر پولو د فدراسیون له جوړیدو څخه وروسته ددې ورزش د لوبډلې د جوړیدو په هدف دوه تنه امریکايي روزنکي بهرام هاجره او سکات کارسو د افغانستان د واتر پولو د فدراسیون په همکارۍ کابل ته راغلي چې پنځوس تنه لوبغاړي به په عملي او نظري توګه وروزي.



ددې ورزش امریکایي روزونکی بهرام هاجره وایي: « موږ غواړو د دوی استعدادونو او وړتیاو ته وده ورکړو،‌ دوی ته روزنه ورکړو چې قهرمانان او غوره لوبغاړي شي.»

د افغان لوبغاړو دغه امریکايي روزنکي وايي چې دوی به لوبغاړي په نړیوال معیار وروزي. په ورته وخت کې افغان لوبغاړي وايي دوی پخوا دغه راز روزنه نه وه ترلاسه کړې او هیله من دي چې وکولای شي ددغو امریکايي روزنکو له روزنې څخه ښه ګټه واخلي.

د افغانستان د واتر پولو فدراسیون وايي چې افغانستان ته د امریکايي روزنکو راتګ به د دواړو هیوادونو ترمنځ د کلتوري راکړې ورکړې لامل شي او دوی به په راتلونکې کې هم له دغه راز روزنیزو پروګرامونو څخه ګټه واخلي.

د واټر پولو لوبه یو کال مخکې په افغانستان کې پیل شوې چې اوس مهال په هرات، بلخ او کابل ولایتونو کې نږدې یو سلو او شل تنه په مسلکي توګه دغه ورزش پرمخ بیایي.
XS
SM
MD
LG