د لاس رسي وړ اتصالات

د ایډز ناروغۍ نړیواله ورځ او افغانستان


د ایډز ناروغۍ نړیواله ورځ

د ایډز ناروغۍ نړیواله ورځ

د عامې روغتیا د وزارت مرستیالې ناجیې طارق په کابل کې د ایډز د نړیوالې ورځې د لمانځنې غونډې ته وویل، سږ کال په افغانستان کې د ایډز ۱۶۲ پيښې ثبت شوي دي.
هغې وویل، تیر کال ۱۱۷ پيښې ثبت شوې وې چې سږنۍ احصایه اته دېرش فیصده زیاتوالی ښيي.

ددې وزارت په وینا د تیر لمریز کال تر پایه په افغانستان کې په مجموعي ډول د ایډز ۱۵۲۹ پیښې ثبت شوې وې.
روغتیایي چارواکي وایي د هرات په ولایت کې ددې ناروغانو شمیر تیر کال اته پنځوس کسه و، خو سږ کال ١٢٩ ناروغان ثبت شوي دي.

د دسمبر لومړۍ نیټه د ایډز ناروغی نړیواله ورځ ده. دغه ورځ د ١٩٩٨ م میلادي کال راهیسيي لمانځل کیږي او د ایچ ای وي ایډ پر ضد مبارزین وایي دغه ورځ ددې یادونه کوي چې ایډز اوس هم د نړی ستر چیلنج یا ننگونه ده.

د برما د اپوزیسیون مشره ان سان سوچې په استرالیا کې د ایډز د ناروغانو سره د تبعیض د له منځه وړلو نړیوال کمپاین ته پرانیستونکې وینا وکړه.

ان سان سوچې
« له موږ سره زموږ د سیاسی مفکورې له امله تبعض شوی دی، خو په یوه مدني ټولنه کې د نسل، مذهب، عقیدې، فزیکي نیمگړتیا او یا فزیکي ناروغی له امله تبعیضي چلند ناروا کار دی.»

په نایجیریا کې د فوټبال ملي لوبغاړي د ایچ ای وي ایډز پر ضد د عامه پوهاوي د لوړوالي په کپپاین کې له مبارزینو سره یو ځای شوي وو. خو ددې ناروغی ضد کمپاین کوونکي وایي د دوامداره عامه پوهاوي پورگامونو ته اړتیا لري.


دوی وایي، یو شمیر خلک په ناپوهي کې په دې ناروغی اخته کیږي او یو شمیر خلک په دې نه پوهیږي چې له دې ناروغی د ځان د ساتلو د پاره څه وکړي. دا یوه ستره مسله ده او اوس ورځ په ورځ د ایچ ای وي ایډز څخه د خلکو توجه نورو لوریو ته اوړي.

د ناروغیو د کنترول امریکایي اداره وایي چې په نړی کې شا او خوا پنځه دیرش میلیونه کسان په ایچ ای وي ایډز اخته دي. ایج ای وي د ایډز د ناروغی د وایروس نوم دی.

د ایډز نړیواله ورځ ددې موقع برابروي چې د نړی خلک په یوه خوله ددې ناروغی پرضد یوه بل ته لاسونه ورکړې.

ددې وژونکې ناروغی پرضد مبارزین وایي چې د درملو د موندنې، عامه پوهاوي د لوړوالي او د ناروغی پر ضد نړیوال کمپاین مالي انسجام ته اړتیا لري.
XS
SM
MD
LG