د لاس رسي وړ اتصالات

د جوزجان والایت امنیتي چارواکي وايي چې په دغه ولایت کې سېلاوونو لږترلږه ۴۳ تنه وژلي دي او په سلګونو کورونو ته زیان اړولې دی.

د جوزجان ولایت امنیه قوماندان فقیرمحمد جوزجاني امریکا غږ اشنا راډیو ته وویل چې سیلاوونو د قوش تیپه او درزاب په ولسوالیو کې خلکو ته د سر اومال زیان اړولې دی او د خواجه دوکوه په ولسوالۍ کې هم یې خلک د زښتو ستونزو سره مخ کړي دي.

فقیرمحمد جوزجاني وویل:

یو شمیر شهیدان چې مونږ له سیلاب را ایستلې دي شمیر یې ۴۳ تنو ته رسیږې، چې ماشومان،ښځې او سړي په کې شامل دي یو شمیر یې د سرپل نه راوړې دي او یو شمیر نوریې د قوش تیپه او درزاب نه راوړې دي.

فقیرمحمد جوزجاني وویل چې یو شمیر کسان چې خواجه دوکوه په ولسوالۍ کې د سیلاب د ګواښ سره مخ وو، د افغان پوځ په هلیکوپترو کې خوندي ځایونو ته لیږدولې دي.

خو جوزجاني وویل چې د خواجه دوکوه په ولسوالۍ کې یو شمیر کسانو د خپلو څارویو خوندیتوب په باب د اندیښنو له امله و نه غوښتل چې د هلیکوپترو پواسطه خوندي ځایونو ته لیږدول شي.

د سیمي اوسیدونکي وایي چې بارانونو اورښت د شپې په ۸ بجو پیل او د سهار تر ۴ بجو یې دوام وکړ چې له امله یې په دغه سیمه کې په پراخه توګه کرکیله هم زیانمنه شوي ده.

په جوزجان کې چارواکي ويره ښيي چې ښايي د وژل شويو کسانو شمېرنورهم لوړ وخيژي، او دا ځکه دوی ته دسرپل ولایت د تلفاتو په باب راپورنه دی ورکړل شوي او هم سیمه ایزو اوسیدونکو دوی ته د لسګونه کسانو د وژل کېدو او ژوبلېدو راپورونه ورکړي دي.

بل خوا په بادغيس ولايت کې چارواکي وايي ددغه ولایت په مرکز په قلعه نو کې سيلاوونو اته کسه وژلي دي.
XS
SM
MD
LG