وروسته له هغې چې د امریکا د متحده ایالاتو ولسمشر باراک اوباما د @POTUS یا د امریکا د متحده ایالاتو د ولسمشر په نامه په ټوټیر کې یوه نوې پاڼه پرانستله په څه کم پنځه ساعتونو کې د تعقیبوونکو شمیر له یو میلیون څخه واوښت. اوس د څلورو ورځو په تیریدو سره د هغه د پاڼې د تعقیب کوونکو شمیر دوه میلیونه ٢٧٠ زره تنه شوی دی.
د ښاغلي اوباما ټویټر د یوې په پاڼې په توگه چې په ډیر کم وخت کې یې یو میلیون کسان راجذب کړل په نړیوالو ریکارډونو کې ثبت شوه. له دې دمخه د رابرت داوني جونیر، نوم په دې نړیوال کتاب کې ثبت و چې د هغه د ټویټر پاڼه د ٢٠١۴ کال په اپریل کې په څه کم ٢۴ ساعتونو کې څه دپاسه یو میلیون کسانو تعقیب کړې وه.
سپینې ماڼۍ ویلي دي د @POTUS ټویټونه چې د متحده ایالاتو د ولسمشر مخفف دی، پخپله ولسمشر اوباما لیکي.
په خپله ټویټر پاڼه @POTUS کې ښاغلي اوباما لومړنی پیغام په سپینه ماڼۍ کې د خپل آیفون له لارې ولیکه. په دې پیغام کې لیکل شوي وو چې "سلام، ټویټر! زه باراک یم. واقعاً! وروسته له شپږو کلونو څخه، بالاخره هغوی زما پاڼه راته راکړه."
د امریکا د متحده ایالاتو پخوانی ولسمشر بل کلنتن، ښاغلي اوباما ته د خپل ټویټر (@billclinton.) څخه دغه پیغام واستوه " @POTUS! ټویټر ته ښه راعلئ، یوه پوښتنه: آیا ددې پاڼې نوم د سپینې ماڼۍ د استفادې لپاره پاته کیږي."
ښاغلي کلنتن د #askingforafriend هشتگ له لارې خپلې میرمنې هیلري کلنتن ته اشاره کړې ده چې د ٢٠١٦ کال د امریکا د جمهوري ریاست انتخاباتو ته نومانده شوې ده.
په ځواب کې ښاغلي اوباما لیکلي دي "ښه پوښتنه @billclinton. دا به د سپینې ماڼئ لپاره وي. داسې څوک پیژنې چې د @FLOTUS په نامه پاڼې ته مینه وال وي؟" FLOTUS د امریکا د متحده ایالاتو د لومړۍ میرمنې مخفف دی.
سپینې ماڼۍ د White House په بلاگ کې لیکلي دي چې د @POTUS د ټویټر پاڼه به د نوي تگلارې په توگه وکارول شي تر څو ولسمشر اوباما په مستقیمه توگه د امریکا له خلکو سره په تماس کې اوسي.
په دې بلاگ کې راغلي دي چې ښاغلی اوباما ژمن دی چې خپل حکومت په تاریخ کې د تر ټولو د خلاصې دروازې او او د ولس سره د نژدې اړیکو لرونکي حکومت په توگه ثبت کړي.
له دې څخه دمخه ولسمشر اوباما د @BarackObama په نامه پاڼې له لارې ټویټ کاوه چې د جمهور رئیس د مخکني انتخاباتي کمپاین له خوا یې مدیریت کیده. د ښاغلي اوباما پیغامونه د سپینې ماڼۍ په ټویټر @WhiteHouse کې هم خپریدل چې زیاتره پیغامونه یې د سپینې ماڼۍ کارکوونکو لیکل، خو که ولسمشر پخپله پیغام ولیکي د هغه په پای کې به د “BO” علامه لیکي.
د ښاغلي اوباما @BarackObama د نړۍ د نفوذ لرونکو مشرانو په ډله کې یو د زیاتو پلویانو لرونکو پاڼو څخه دی چې ۵۹ میلیون او ۴۰۰ زره خلک یې تعقیبوي.
د روسېی د ولسمشر ولایمیر پوتین رسمی ټویټر @PutinRF_Eng چې په انگلیسي ژبه ټویټ کوي، شاو خوا ۲۵۰ زره تنه پلویان لري.
په آسیا کې د هند د صدراعظم نرندرا مودي ټویټر @narendramodi څه دپاسه ١٢ میلیونه او ۴۰۰ زره تنه پلویان لري.
په اروپا کې د برتانیې د صدراعظم دیوید کمرون Number10gov@ له نورو څخه زیات پلویان لري چې شمیر درې میلیونه او ۲۵۰ زرو ته رسیږي.
په منځني ختیځ کې د ترکیې د ولسمشر رجب طیب اردغان ټویټر @RT_Erdogan څه دپاسه شپږ میلیونه او ۴۰۰ زره او د د دوبۍ د امیر شیخ محمد بن راشد آل مکتوم ټویټر @HHShkMohd څه دپاسه څلور میلیونه پلویان لري.