د لاس رسي وړ اتصالات

ارګ: د پاکستان د دفاع وزیر خبرې نامسولانه دي


ولسمشر غني پر پاکستاني چارواکو غږ کړی چې له دا ډول څرګندونو دې ډډه وکړي.

د ولسمشر محمد اشرف غني دفتر په یوې خبرپاڼې کې د پاکستان د دفاع وزیر وروستۍ څرګندونې په کلکه غندلي دي.

ویل کیږي چې د شنبې په ورځ د پاکستان د دفاع وزیر خواجه اصف رسنیو سره په خبرو کې ویلي وو چې په افغانستان کې د تاپی د پروژې د امنیت لپاره به له طالبانو سره خبرې وشي.

خو، د افغانستان جمهوري ریاست وايي د ښاغلي اصف دا څرګندونې "نامسولانه او په افغانستان کې د نه مداخلې په اړه د دواړو هېوادونو د مشرانو د ژمنو پر ضد دي دي".

ارګ وايي د افغانستان د ملي ګټو او عادي افغانانو د امنیت ساتل د افغان ځواکونو دنده ده او د دغې نل لیکې د امنیت لپاره یې هم ځانګړي ځواکونه چمتو کړي دي.

افغان حکومت وايي چې د پاکستان د دفاع وزیر دغه څرګندونې ښيي چې لا هم یو شمېر پاکستاني چارواکي او مشران د افغانستان په چارو کې له لاسوهنې سره دلچسپي لري او دا چې پاکستان پر افغان طالبانو پراخ نفوذ او اغیز لري.

ولسمشر غني یو وارې بیا د پاکستان پر مشرانو غږ کړی چې د ترهګرۍ پر ضد مبارزې کې له افغان حکومت سره پر خپلو ژمنو ودریږي او له دا ډول څرګندونو دې ډډه وکړي.

د تاپي پر پروژې له کلونو کلونو راهیسې خبرې روانې وې، ویل کیږي چې پر دغې پروې به شاوخوا لس میلیارده ډالره لګښت او د ۲۰۱۷ کال په ډسمبر کې د ګازو انتقال پیل کړي.

افغانستان به د کال ۴۰۰ میلیونه ډالره د ترانزیت حق اخلي او شاوخوا دوه میلیارده کیوبیک مېتره ګاز به هم ترلاسه کوي او زرګونه افغانانو ته کارونه هم برابر کړي.

د تابي د پروژې رغنیزي چارې د یکشنبې په ورځ په ترکمنستان کې رسماً پیل شوې. د دغه پروژې په واسطه به په ترکمنستان کې د کاسبین د بحیري طبعي ګاز د افغانستان له لارې، پاکستان او بیا هند ته انتقالیږي.

دغه نللیکه شاوخوا اووه سوه کیلیو مېتره د کندهار-هرات له لويې لارې د پاکستان د کوټې ښار ته ننوځي.

  • 16x9 Image

    جعفر هاند

    جعفر هاند د هند په اندرا ګاندي پوهنتون کې په سیاسي علومو کې ماسټري کړې ده؛ د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی.

     

XS
SM
MD
LG