د پاکستان مشهور پښتون هنرمند،سندرغاړی او فلم جوړونکی ،جمال شاه چې دا وخت د پاکستان د نیشنل کونسل فار ارټس مشر هم دی.په اسلام اباد کې د افغانستان د سفارت د کلتوري اتشه ښاغلي عبدالرحمن حبیبزوی سره ېې یوه لیدنه کې ژمنه کړیده چې دی به افغانستان ته ځي او هلته به د افغانستان د هنرمندانو او هنري قشرونو سره خپله تجربه شریکوي او هر ډول همکاري به ورسره کوي.
جمال شاه پخپله د امریکا غږ اشنا راډیو سره مرکه کې وویل چې دی د افغانستان سره ځانگړې رشته او مینه لري او هرکله چې ورته بلنه ورکړل شي دی تیار دی چې هلته لاړ شي او د څه ېې چې له توانه کیږي، همکاري به ورسره کوي.
جمال شاه چې دا دې نیزدو ورځو کې ېې د بدل په نوم یو سینمايي فلم هم جوړ کړیدی ،غواړي چې د ده فلم د افغانستان په سینما گانو کې نندارې ته وړاندې شي. جمال شاه وايي چې بدل فلم په سیمه کې د افراطیت او ترهگرۍ په روانو نادودو جوړ شویدی ،چې د افغانستان اوپاکستان دواړه ولسونه ېې اغیزمن کړیدي.
جمال شاه وايي چې هنر یوازینۍ او گټوره وسیله ده چې د دواړو طرفونو ترمنځ موجودې کشالې حل کولی او بدگمانۍ ختمولی شي. هغه وویل چې هنر مندان د سولې سفیران وي او د دوي تگ راتگ د دواړو طرفونو د اړیکو دپاره یو ښه زیری کیدی شي.
د جمال شاه سره د لیدو نه پس اسلام اباد کې د افغانستان د سفارت کلتوري اتشه ښاغلي عبدالرحمن حبیبزوی وویل چې دوي چې د کومې ورځې نه کار پیل کړیدی نو د پاکستان حکومت ته ېې د فرهنگ او هنر د پوهاوي، د رسنیو او تورزیزم په برخه کې د همکاریو په اړه تړونونه وړاندې کړیدي، چې لا ېې ځواب نه دی راغلی. خو د پاکستان د ارټس د ملي کونسل د نوي مقرر شوی مشر جمال شاه سره خبرو کې ورته دا ډاډ ورکړل شو چې دوي به دغه تړونه تعقبوي او عملي بڼه به ورکوي
ښاغلي حبیبزوی وویل چې باید یو داسې چوکاټ کار وشي چې داسې هنري پروگرامونه تیار شي چې د دواړو طرفونو پښتنو ته خپل تولید او د کلتور ښکارندوی ووسي.
دې لیدنه کې اسلام اباد کې د افغانستان د سفارت فرهنگي اتشې جمال شاه ته افغانستان ته د راتلو بلنه وركره همداشان د افغاني سينما په برخه كي د گډو هنري پروگرامونو په جورولو باندي توافق هم وشو.
