د حزب إسلامي د هیات مشر وایي ګلبدین حکمتیار به په میاشتو کې نه، بلکې څو اونیو کې هیواد ته ستون شي. د اسوشیتیدپرس اژانس لیکلي چې د حکمتیار په ستنیدو سره به د أفغانستان په سیاسي چاپیریال کې بدلون راشي او د طالبانو پرضد جګړه به نوره هم پیچلې شي.
د حزب إسلامي د هیات مشر امین کریم د اسوشیتیدپرس اژانس ته د همدې اونۍ په پیل کې وویل چې حکمتیار به په لنډو اونیو کې کابل ته ستون شي.
ښاغلئ کریم چې د سولې موافقه يي کړې، په خپله د سختو امنیتي تدابیرو لاندې په کابل کې اوسیږي. او په یوشمیر أفغان رقیبانو او د سیمې پر هیوادونو انتقاد کوي چې وایي د حکمیتار د بیرته ستندو مخه نیسي او وایي د حزب إسلامي اکثره هغه قوماندانان چې غوښتل يي کابل ته راشي، نیول شوي دي.
ګلبدین حکمتیار چې د ۲۰۰۱ کال وروسته يي د امریکایي ځواکونو سره وسله واله جګړه کوله، د تیرکال سیپتمبر میاشت کې یي د أفغانستان د حکومت سره د پخلاینې موافقه وکړه.
حکمتیار ته د جمهور رئیس غني او اجرایه رئیس عبدالله په مقابل کې د یو قوي سیال په نظر کتل کیږي. اسوشیتیدپرس لیکي چې د حکمتیار په ستنیدو به نوې سیاسي بی باوري پیدا شي ځکه حکومت د طالبانو د بیاقوت موندنې په مقابل کې په جګړه اخته دي.
تیرکال د حکمیتار د سولې موافقې داسی هیلې پیداکړې چې کیدی شي دا کار په هیواد کې د یوې عمومي پخلاینې لپاره بیلګه شي چې طالبان هم پخلا شي، خو حتی حکمتیار تراوسه کابل ته ندې ستون شوی.
د حکمتیار ډله غواړي د هغه نوم د ملګروملتونو او د امریکا د خزانې وزارت اړوند د ترهګرو د تور لست څخه وایستل شي. ښاغلي کریم دا خبره ځواب نکړه چې که د نوم د لری کولو مخکې حکمتیار کابل ته ستون شي او داسی کومه نښه هم نده څرګنده شوې چې که ملګري ملتونه او امریکا به د حکمتیار د نور لری کولو غور وکړي. کاناډا او بریتانیه د حزب إسلامي یوه ترهګره ډله ګڼي.
خو د أفغانستان حکومت وایي د سولې په موافقه کې خپلو شویو ژمنو او کابل ته د حکمتیار ستنیدلو ته متعهد دی او د هغه ستنیدنه یو نیک قدم ګڼي.
