د افغانستان په بگرام هوایې اډه کې امریکایي ځواکونو د کرسمس یا د عیسی ع د میلاد جشن لمانځل د چهارشنبې په ورځ پیل کړي دي.
د بگرام پوځي اډه د امریکایي قواو ترټولو مهم پوځي مرکز دی چې هلته د ناټو ځواکونه هم ورسره میشت دي.
د چهارشنبې په ماښام د کرسمس جشن د عسکرو لخوا په سندرو او خوشالیو پیل شو.
د امریکا منتخب جمهور رئیس براک اوباما د کرسمس د جشن په
ویاړ خپل د مبارکې ثبت شوی پیغام هم وړاندې کړ او پکې یې د اردو د خدمتونو
ستاینه کړې.
ددوی په خوا کې د سه شنبې په ورځ د ایساف قواو شاوخوا دوه سوه عسکرو هم په کابل کې د کرسمس جشن ولمانځه.
دوی ویلی چې د خپلو کرونیو پسی خپه دي خو د افغانانو لپاره د سولې او ثبات راوړلو دنده په غاړه لري.
یو شمیر برتانوي او امریکایي عسکر نن پنجشنبې هم په کابل کې د کرسمس جشن ولمانځلو.
بل پلو، د برتانیې اردو ویلي دي چی یوعسکر یې په افغانستان کی د یاغیانو سره په جگړه کی وژل سوی دی.
اردو وویل چی دا عسکر پرون د چهارشنبې په ورځ د هلمند د ولایت د نادعلي په ولسوالي کی ووژل شو.
په افغانستان کی تقریبا ٧٠ زره خارجي عسکر پراته دي چی د یاغي طالبانو سره په جگړو بوخت دي.
پرون افغان او بین المللي قواو وویل چی دوی د بغلان په ولایت کی د یاغیانو په یوې مشکوکي اډې باندی په حمله کی د هغوی یو غټ قوماندان نیولی دی.
د افغان او امریکا د اردو گانو په یوه گډه بیانیه کی وویل سول چی په دغه قوماندان ملا داود باندی دا شک راځی چی د اکتوبر په میاشت کی یې په بغلان کی په یوه مرگانۍ حمله کی او په ٢٠٠٧ کال کی یې د بورې په فابریکه کی د بم په چاودنه کی چی څه د پاسه ٥٠ تنه په کی مړه شول، لاس درلود.