د ناتو ستر قواندان جان کریډاک نن د سه شنبې په ورځ افغانستان ته رسیدلی او غواړي د چارواکو او عسکرو سره چی په هغه ملک کی د یاغیانو د ورځ په ورځ زیاتیدونکو حملو سره مخامخ دي خبري وکړی.
ناتو په دې باب نور توضیحات نه دی خپاره کړي.
دغه امریکایي جنرال پرون اسوشیټیډ پریس خبري آژانس ته و ویل چي دی ددې خبري سره کوم مخالفت نه لری چی که د ناتو غړي د ایران سره په دې باب خبري کوي چی هغه ملک په افغانستان کی د ناتو قواو ته د موادو په رسولو کی د خپلي خاوري نه استفاده وکړی.
کریډاک وویل چی ناتو په دې باب فکر کوي چی د هغو لارو په ځای چی د پاکستان نه تیریږي او افغانستان ته مواد رسول کیږي نوري لاري پیدا کړی، ځکه چی په پاکستان کی د ناتو د موټرو په کتارونو باندي حملې کیږي.
پاکستاني چارواکو نن د سه شنبې په ورځ وویل چي مشکوکو یاغیانو په صوبه سرحد کی یو پل الوځولی او په افغانستان کی یې د ناتو د قواو دپاره د موادو رسولو مهمه لار بنده کړې ده.
د امریکا ددفاع وزارت وایی چي په افغانستان کی د ناتو قواوپه ٢٠٠٨ کال کی د یاغیانو په حملو کی د ٣٣ فیصده زیاتوالي رپوټ ورکړی دی.