اروپايي اتحاد وايي، له اسرائیلو سره د دوی اړیکې په دې پورې اړه لري چې دغه یهود دولت د اسرائیلو او فلسطین د بحران د ختمولو لپاره د دوو خپلواکو دولتونو جوړېدو ته غاړه کښیږدي.
د اروپايي اتحاد د بهرنیو اړیکو رئیس، هاویر سولانا نن د اسرائیلو د نوي منتخت صدراعظم بنجامن نیتان یاهو څخه وغوښتل چې دده حکومت باید د اسرائیلو تر څنگ د یوه آزاد فلسطیني حکومت جوړېدل ومني.
له بلې خوا، د اسرائیلو د کابینې هغه غونډه ځنډېدلې ده چې غوښتل یې په غزه کې د نیول شوي اسرائیلي عسکر د راخوشې کولو لپاره له حماس سره په خبرو بوخت مرکچیانو ته نور وخت ورکړي.
د اسرائیلو برحال صدراعظم ایهود المرت چې د واک موده یې په ختمېدو ده، قاهرې ته دوه عالي رتبه چارواکي لیږلي چې له مصري منځگړو سره خبرې وکړي. هغه نن ناوخته د کابینې غونډه تر سبا پورې وځنډوله.
د حماس جگړه مارانو درې کاله مخکې، د اسرائیلو عسکر گیلاد شالیت پر سرحد باندې د یوې جگړې په ترڅ کې نیولی و.
له بلې خوا، د جنگي جنایتونو د نړیوالې څارونکو یوې ډلې نن پر ملگرو ملتونو غږ کړی چې د هغو تورونو په اړه غور وکړي چې وايي، اسرائیلو او حماس دواړو په غزه کې په خپله وروستۍ جگړه کې نړیوال بشري قوانین تر پښو لاندې کړي دي.