پاکستاني قواو په صوبه سرحد کی یوه ورځ وروسته له هغه په یاغي طالبانو باندی حملې پیل کړی دي چی یاغیانو د حکومت په طرفداري قبایلي ملیشې باندی برید وکړ.
پاکستاني چارواکي وایی چی توپ لرونکو هلیکوپترو نن د پنجشنبې په ورځ په کرمه او اورکزیو کی د هغو یاغیانو په ځایونو باندي بمبارۍ وکړې چی د پاکستاني طالبانو د مشر بیت الله مهسود سره اړیکي لری او لږ تر لږه ١٢ تنه یې په کی ووژل.
پاکستاني مامورین وایی چی مهسود تیره هفته د امریکا د بې پیلوټه الوتکي د توغوندیو په حمله کی وژل شوی دی، او ځینو امریکایي مامورینو ویلی دي چی داسی نښي نښانې موجودی دی چی د مهسود په قواوکی بې نظمي راغلې ده.
مگر ځیني طالبان وایی چی مهسود ژوندی دی او یوې خوا لا هم تر اوسه پوری باوري شواهد نه دي وړاندی کړي.
د پاکستان د حکومتي قواو دغه ننۍ حمله یوه ورځ وروسته له هغه کیږي چی د بیت الله مهسود طرفدارانو د ترکستاني بیټني په مشري د حکومت په طرفداري قبایلي ملیشې باندی حمله وکړه. په دې جگړه کی ددواړو خواو نه تقریبا ٧٠ کسه وژل شوي دي.
عیني شاهدان وایی چی د بیټني د سړو تقریبا ۴٠ کورونه هم تبا شوي دي. مگر دا رپوټ مستقلو منابعو ځکه نه دی تایید کړی چی دغي سیمي ته خبریالان نه سی ورتللای.
بیټني د امریکا غږ اردو خپروني ته وویل چی دده سړي د جنوبي وزیرستان او د ټانک د ښارگوټي تر منځ په څو بیلو بیلو ځایونو کی په جگړو اخته دي.