د لاس رسي وړ اتصالات

پیښور کې ځانمرگي ١٩ تنه ووژل


پاکستاني چارواکي وايي چې په صوبه سرحد کې د حملو په لړ کې نن یوه ځانمرګه حمله کونکي د پېښور په ښار کې د یوې محکمې دباندې ځان والوزاوه او لږ تر لږه ۱۹ کسه یې ووژل.

دا شپږمه چاودنه وه چې د دوو اونیو نه په لږ وخت کې د پېښور په ښار کې وشوه.

د پولیسو یو عالي رتبه افسر ویلي چې ځانمرګه هغه وخت ځان ولوزاوه کله چې د امنیتي ساتونکو دخوا د محکمې په دروازه کې دتلاشۍ په خاطر ودرول شو.

چارواکي وايي چې د وژل شویو کسانو په جمله کې درې تنه د پولیسو افسران هم شامل دي. په دغه حمله کې لږ تر لږه ۳۶ کسه ټپیان هم شول.

په عین حال کې د پاکستان صدراعظم یوسف رضا ګیلاني دغه حمله وغندله او یوځل بیا یې پر خپل نظر ټینګار وکړ چې پاکستان د ترهګرو سره د جګړې دپاره نړیوالې مرستې ته اړتیا لري.

د پاکستان په صوبه سرحد کې د یاغیانو حملو وروسته د هغه نه زور واخیسته چې پوځ د دوی پرضد په جنوبي وزیرستان کې د اکتوبر په نیمايي کې عملیات پیل کړل.

په پاکستان کې وروستۍ چادونه څو ساعته وروسته د هغه نه وشوه چې په شمالي وزیرستان کې چې د طالبانو بل مورچل بلل کېږي، د آمریکا د بې پیلوټه الوتکې په حمله کې لږ تر لږه درې کسه ووژل شول او څلور نور زخمیان شول.

شمال وزیرستان هم د افغانستان سره په سرحد کې پروت دی.

XS
SM
MD
LG