د لاس رسي وړ اتصالات

نیویارک ټایمز: دافغانستان د کابینې پر سر جنجال


د نیویارک ټایمز ورځپاڼه د جنورۍ د پنځمې نیټې په گڼه کې د د جمهور رئیس کرزي نومول شویو وزیرانو ته د پارلمان د اعتماد د رایې د ورکولو د مسئلې په اړه لیکي، دغه لانجه نوره هم هغه وخت زیاته شوه چې جمهوررئیس د یوه فرمان په ترڅ کې د ولسي جرگې د غړو نه غوښتنه وکړه چې خپلې ژمنۍ رخصتۍ وځنډوي.

ورځپاڼه لیکي چې پارلمان تیره شنبه ډیر شمیر وزیرانو ته د اعتماد رایه ورنکړه او دا پخپله د هغه مایوسیت او عدم رضایت نښه ده چې د پارلمان د مختلفو طبقو وکیلان داسې فکر کوي چې دوی سره د وزیرانو په نومولو کې سلا مشوره نه وه شوې.

نیویارک ټایمز لیکي، د پارلمان دا پریکړه ددې نښه ده چې غړي یې اوس ځان ډیر خپلواک گڼی.

دوی په اولو وختونو کې د جمهوري ریاست ډیر خیال ساته.

د مهمو وزیرانو ردیدل ددې سبب کیږي چې ځنې مهم وزارتونه بې سرپرسته پاتي شي او د حکومت ځنې څانگې فلج پاتې شي.

په دې کې د عامې روغتیا او د عدلیې وزارتونه شامل دي.

نیویارک ټایمز په افغانستان کې د ملگرو ملتو د استازي له خولې لیکي چې ده د پارلمان په دریځ انتقاد کړی دی خو دا یې ویلي دي چې د افغانستان پارلمان د ځینو هیوادو د پارلمانونو په شان نه دی چې یې له ځانه کوم صلاحیت ونه لري.

ډیر شمیر وزیرانو ته د اعتماد د رایې نه ورکول ددې ښکارندوی دی چې کرزی په دې نه دی توانیدلی چې د مقننه قوې غړي په خپل اعتماد کې واخلي او ښه کاري علایق ورسره ټینگ کړي.

ځنې ډیپلوماتان وايي چې داسې پېښې هم شوي دي چې د پارلمان غړي وزارتونو ته د خپلو موکلانو د غوښتنې سره تللي دي خو ددوی غوښتنو ته حکومت مثبت ځواب نه دی ویلی.

ډپلوماټان زیاتوي چې ډیر کله پخپله کرزي هم پارلمان په نظر کې نه دی نیولی.

XS
SM
MD
LG