د لاس رسي وړ اتصالات

​حبیب الرحمان حکمتیار: طالبان له افغانانو سره له مخامخ خبرو ډاریږي


حبیب الرحمان حکمتیار وایي د معلم میرولي پر کور حمله د "مزدورو او اجرتي قاتلانو کار" دی

حبیب الرحمان حکمتیار، په ولسي جرګه کې د هلمند د یو استازي معلم میرولي په کور د تیرې اونۍ په وسله وال برید کې د هغه د کورنۍ د یو شمیر غړو او په ولسي جرګه کې د ارزګان ولایت د یو استازي عبیدالله خان بارکزي د زوی د وژل کیدو په یاد په جوړه شوې غونډې کې د اسلامي حزب د مشر ګلبدین حکمتیار د خواخوږۍ پیغام ولوست.

حبیب الرحمان حکمتیار وویل چې د معلم میرولي پر کور حمله د "مزدورو او اجرتي قاتلانو کار دی" او زیاته یې کړه د طالبانو په حملو کې "یا مجاهد وژل کیږي، یا د قرانکریم حافظ وژل کیږي، یا انجینر، ډاکټر یا د حفیظ په څیر زمونږ ښه تکړه ځوان په شهادت رسول کیږي".

هغه ادعا وکړه چې بهرنیان په افغانستان کې د بحران د ساتلو او د دغه هیواد د بې ثباتۍ لپاره له طالبانو کاراخلي. ښاغلي حبیب الرحمن وویل چې طالبان له افغانانو سره د خبرو کولو ویره لري.

حبیب الرحمان حکمتیار وویل " که خبرې هم دوی [طالبان] کوي تاته وایي، یوازې ځمه امریکا سره خبرې کوم، هغه ته هم خواست دا کوي چې ماته ارګ راکړه بل شی مه راکوه، چې د هغوی څخه یې په زور په التماس غواړي، له افغانانو څخه شرمیږي، ډاریږي مخامخ خبرو ته نشي تیاریدی، جرت یې نه لري، د سیاسي مبارزې جهت او جرات په دوی کې نشته".

تیره اونۍ په ولسي جرګه کې د هلمند د یو استازي معلم میرولي په کور د وسله والو طالبانو په برید کې د معلم میرولي د کورنۍ د یو شمیر غړو د وژل کیدو ترڅنګ په ولسي جرګه کې د ارزګان د ولایت د یو استازي عبیدالله خان بارکزي یو ځوان زوی هم وژل وو.

معلم میرولي: په کور له برید وړاندې راباندې تر سلو ځلو نور بریدونه هم شوي
معلم میرولي: په کور له برید وړاندې راباندې تر سلو ځلو نور بریدونه هم شوي

په دې برید کې اته تنه ووژل شول او د معلم میرولي په ګډون شپږ تنه نور ټپیان شول.

طالبانو ددغه برید مسولیت په غاړه اخیستی و او ویلي وو، چې د معلم میرولي په میلمستون کې یې د افغان حکومت او د جنوبي ولایتونو د پارلمان د غړو او امنیتي چارواکو په یوه غونډه برید کړی دی.

په ټولنیزو رسنیو کې داسې رپوټونه خپاره شوي چې حفیط الله پاڅون بارکزي دوه اونۍ وړاندې د ګلبدین حکمتیار د ورور د لور سره کوژده کړې وه. پخپله د حفیظ الله پاڅون بارکزي، پلار نننۍ غونډې ته دومره وویل، چې د هغه کوژده په یوې ډیرې دیندارې مذهبي کورنۍ کې شوی وه.

غونډې ته د افغانستان د بهرنیو چارو د وزارت د سیاسي معین حکمت خلیل کرزي او د یو شمیر نورو له وینا سربیره د افغانستان پخواني جمهور رئیس حامد کرزي په ټیلیفون خبرې وکړې.

معلم میرولي غوندې ته وویل چې په کور یې د برید وړاندې په ده باندې په لسگونو بریدونه شوي دي "دا سلمه حادثه وه چې پرما راتله، خو فرق یې دا و چې نهه نوي حادثي چې پر ما تیرې شوي دي هغه شخصآ زما پر سر وې یوازې پرما وې".

طالبانو لا د حبیب الرحمان حکمتیار څرګندونو ته غبرګون نه دی ښودلی، خو د دغې ډلې ویاندویانو په تکرار ویلي چې دوی په افغانستان کې د اسلامي نظام د پلي کیدو لپاره په جګړه بوخت دي او ترهغې چې په دغه هیواد کې بهرني ځواکونه دیره وي له افغان حکومت سره به مخامخ خبروته حاضر نه شي.

XS
SM
MD
LG