د لاس رسي وړ اتصالات

کندز کې نن بیا جګړو زور اخیستی


د کندز د تازه جګړو په لومړۍ ورځ طالب وسله والو ددغه ښار دغه مرکزي چوک هم نیولی وو، چې بیا وروسته افغان ځواکونو ونیوه.
د کندز د تازه جګړو په لومړۍ ورځ طالب وسله والو ددغه ښار دغه مرکزي چوک هم نیولی وو، چې بیا وروسته افغان ځواکونو ونیوه.

په کندز کې امنیتي چارواکي وایي، تیره شپه یې د یو لړ عملیاتو په ترڅ کې د دغه ښار په یو شمیر سیمو کې د طالب وسله والو پر وړاندې پرمختګ کړی اویوشمیر سیمې یې بیرته نیولي دي.

د کندز د امنیې قوماندانۍ د امنیت امر محمد معصوم هاشمي امریکاغږ ته وویل چې افغان ځواکونو د ښار په مختلفو برخو کې پرمختګ کړی دی.

نن په کندز کې د جګړې پنځمه ورځ ده، په ښار کې د طالبانو او افغان ځواکونو جګړه د ښار په مختلفو ځایونو کې جریان لري.

په کندز کې د پولیسو د سپین زر زون قوماندانۍ مطبوعاتي څانګه وايي چې د دغه ښار د خواجه مشهد، مولوي سراج الدین لیسې شاو خوا، او د ښار غرب لور ته د سپین زر تر تصدۍ او کابل بندر پورې افغان ځواکونه رسیدلي دي.

د کورنیو چارو د وزارت ویاند صدیق صدیقي هم د خپل ټویټر پر پاڼه لیکلي چې افغان ځواکونو تیره شپه همدا سیمې له طالب وسله والو نیولي دي.

خو د سیمې اوسیدونکي وايي کله چې افغان ځواکونه مخکې لاړ شي طالبان د هغوي شاته راتاویږي او پریښې سیمې بیرته تصرف کوي، په دغه حالت کې افغان ځواکونه د محاصرې د ماتولو هڅه کوي او سیمه بیرته طالبانو ته پریږدي.

دا اوسیدونکي وایي، په تیرو پنځه ورځو کې افغان ځواکونه کله مخکې ځي او کله بیرته خپلو پخوانیو سیمو ته راګرځي.

د کندز پر فضا اکثره وخت هیلوکپټرونو پرواز په حال کې لیدل کیږي.

له هغې ورځې چې طالبان د کندوز ښار ته داخل شوي، د ښار په لوړو ودانیو کې یې ځای نیولی او پر افغان ځواکونو ډزې کوي.

د امنیې قوماندانۍ د امنیت امر محمد معصوم هاشمي امریکاغږ ته وویل چې تر نن مازیګر پورې به د کندز په امنیتي حالت کې تغیر راشي او دوي به د ښار زیاتې برخې تصرف کړي.

د کندز اوسیدونکي بیا په دې بارو دي چې افغان ځواکونه یوه قومانده نه دي.

د سمیع الله سمیع په نوم یو اوسیدونکي امریکا غږ اشنا راډیو ته وویل" چې نن سهار ۱۱:۳۰ بجې له یو نامعلوم ځای څخه ډزې وشوې، هغه پولیسو چې د دورې په سر د امنیت په خاطر ګزمې کوي په رینجرو کې سپاره شول او داسې وتښتیدل چې چا په سترګو هم ونه لیدل".

له بله پلوه د بغلان په جرخشک سیمه کې د افغان ځواکونو د عامه نظم د پولیسو پر کاروان د دولت مخالفو وسله والو برید کړی و چې په نتیجه کې یې ددغه کاروان ځینې موټرې سوځولي او مواد یې ترې چور کړي دی.

وسله والو طالبانو هم ادعا کړې چې طرفدارو یې په بغلان کې د افغان ځواکونو هغه کاروان چې کندز ته پر لاره و ځپلی او تر ۶۳ پورې ډول ډول موټرې یې ترې سوځولي دي.

د طالبانو یو ویاند ذبیح الله مجاهد په یو بیان کې چې رسنیو ته یې استولی ویلي چې د افغان ځواکونو دا کاروان تیره ورځ مازیګر د بغلان ولایت څخه د کندز ولایت ته په لار وو چې د دغې ډلې د وسله والو تربرید لاندې راغلی دی.

طالبانو په دغه برید کې افغان امنیتي ځواکونو ته د سر د زیان د رسلو ادعا هم کړې، خو دقیق شمیر یې نه دی څرګند کړی.

خو افغان چارواکو تر اوسه پورې ددغه کاروان د ځپلو په اړه څه نه دي ویلي.

  • 16x9 Image

    ګل رحیم نیازمن

    گل رحیم نیازمن له کال ٢٠٠٢ نه له امریکا غږ اشنا راډیو سره د خبریال په حیث کار کوي. په کندوز پوهنتون کې لومړی د اقتصاد او وروسته  د ادبیاتو له پوهنځي څخه فارغه شوی. د افغانستان په شمال کې د مدني او ادبي ټولنو فعال غړی دی.

XS
SM
MD
LG