د لاس رسي وړ اتصالات

افغانستان: په پاکستان کې د ټپي پولیس درملنه نه ده شوې


 افغانستان له پاکستان سره اوږد سرحد لري او وخت ناوخت وسله وال د دغه سرحد په اوږدو کې پر افغان امنیتي ځواکونو بریدونه کوي.

افغانستان له پاکستان سره اوږد سرحد لري او وخت ناوخت وسله وال د دغه سرحد په اوږدو کې پر افغان امنیتي ځواکونو بریدونه کوي.

د افغانستان د کورنیو چارو وزارت د پاکستان د پوځ هغه ادعا ناسمه بللې ده چې په کې ویل شوي پاکستاني پوځیانو په دغه هیواد کې د یو ټپي افغان پولیس ژوند ژغولی او په دغه هیواد کې د دغه ټپي پولیس درملنه کړې ده.

د افغانستان د کورنیو چارو وزارت د پاکستان په خاوره کې د یو ټپي سرحدي پولیس درملنه ردوي، خو وایي چې په کونړ ولایت کې دغه ټپي پولیس سره د افغانستان او پاکستان په صفري نقطه کې پاکستاني ګرځنده روغتیا پالانو مرسته کړې ده.

د افغانستان د کورنیو چارو وزارت په یو بیان کې ویلي چې تیره ورځ د کونړ ولایت د سرکاڼو د ولسوالۍ په مربوطاتو کې د افغانستان او پاکستان د سرحد په صفري نقطه کې د مخالفو وسله والو سره له یوې نښتې وروسته د یارجان په نوم یو سرحدي پولیس ټپي شو و، چې د ګرځنده پاکستاني روغتیا پالانو له خوا یې درملنه وشوه او د نورې درملنې لپاره د ننکرهار ولایت ته وړل شوی او اوس د جلال اباد په روغتون کې بستر دی.

د افغانستان د کورنیو چارو وزارت په دغه بیان کې افغان سرحدي پولیسو ته د روغتیایي مرستې د برابرولو له امله د پاکستان له ګرځنده روغتیا پالانو څخه مننه کړې ده.

خو د افغانستان د کورنیو چارو وزارت د پاکستان په خاوره کې د افغان سرحدي پولیس درملنې په باب د پاکستاني چارواکو څرګندونې بي اساسه بللي دي.

د افغانستان د دفاع وزارت د پاکستان د پوځي چارواکو د ادعا په باب بې خبري ښودلې ده.

د افغانستان د دفاع وزارت ویاند دولت وزیري امریکا غږ اشنا راډیو ته وویل چې دا وزرت نه د چا نه مرسته غوښتي او نه هم چا ورسره مرسته کړې ده.

جنرال وزیري وویل " داسې څه مو نه دي لیدلي چې په عملیاتو کې پاکستاني‌ سرتیرو را سره مرسته کړي وي او نه هم له دوی مو د مرستې غوښتنه کړې ده".

تیره ورځ یو شمیر پاکستاني رسنیو د پاکستان د پوځ د چارواکو له خولې ویلي وو، چې د دغه ټپي افغان پولیس درملنه یې د پاکستان په خاوره کې کړې ده.

پاکستان پوځ په یو بیان کې ویلي چې سرتېرو يې ۶۰۰ متره د افغانستان خاورې ته ننوتي چې له ترهګرو سره په جګړې کې له یو ژوبل شوي افغان سرتېري سره مرسته وکړي.

د پاکستان پوځ دغه اعلامیې کې راغلي چې پېښه د سه شنبې په ورځ د باجوړ قبایلي سیمې ته نژدې د افغانستان په ختیځ کې شوې ده.

د پېښې دقیق ځای ښودل شوی نه دی او نه هم د شوې جګړې په اړه ډېر جزئیات ورکړل شوي دي.

د پاکستان د پوځ د مطبوعاتو څانګې ویلي دي چې افغان چارواکو ترې له دغه عسکر سره د مرستې او د هغه د درملنې غوښتنه کړې وه

دغه ادراه وایي چې ژوبل شوی افغان عسکر یې د پاکستان یوه روغتون ته د درملنې لپاره انتقال کړی دی او اوس د باجوړ ایجنسۍپه یوه روغتون کې یې درملنه کیږي.

د افغانستان په ختیځ کې له پاکستان سره اوږدې پولې لري، چې وخت ناوخت ترې وسله وال طالبان او نور اورپکي اوړي او پر افغان امنیتي ځواکونه ډزې او بریدونه کوي.

XS
SM
MD
LG