( موږ په لوګر کې د مس عینک د لرغونو اثارو د ساتلو لپاره هلته موزیم جوړو چې ډېر ضرور دی، په بلخ، کاپیسا او خوست کې د تاریخي اثارو د ساتلو او ناقانونه کېندنو د مخنیوي لپاره موزیمونه جوړو، یو بل هدف دا دی چې باید له دغې لارې ځوان نسل له خپل تېر تاریخ او د هغه له ارزښت نه خبرو کړو.)
نوموړي وویل همدا چې، بودیجه ترلاسه کړي، په یادو ولایتونو کې به د موزیمونو د جوړولو کار پیل کړي، چې ممکن په ځينو برخو کې د بهرنیو انجینرانو او کارکوونکو مرستو ته هم اړتیا پېدا شي .
په همدې حال کې ښاغلي مسعودي وویل ورځ تر بلې د کابل او نورو ولایتونو موزیمونو ته د خلکو او ځوانانو ورتک زیاتیږي، چې دا یو ښه زیری دی .
ده وویل په یو شمېر بهرنیو هېوادونو کې د افغان لرغون توکیو د نندارې له لارې یې په کم وخت کې لږ تر لږه شل میلیونه افغانۍ عواید ترلاسه کړي دي .
د افغانستان د ملي موزیم مشر عمراخان مسعودي دا خبره هم وکړه چې په تېرو څو کلونو کې یې زرګونه قاچاق شوي اثار هم بېرته ترلاسه کړي دي .
( له ۲۰۰۷ کال نه راپدېخوا مو څه باندې نهه زره لرغوني اثار، چې په تېرو کورنیو جګړو کې بهر ته قاچاق شوي و، بېرته ترلاسه کړي دي، دغه اثار تر ډېره له امریکا، برتانیا، فرانسې، جرمني، ډنمارګ او ناروي نه افغانستان ته انتقال شوي دي.)
ښاغلي مسعودي وویل دغه لرغون توکي د ملګرو ملتونو د تعلیمي، ساینسي او فرهنګي مېراثونو سازمان( یونیسکو) په مرسته افغانستان ته انتقال شوي دي چې دغه لړۍ لا هم روانه ده. .
په تېرو شاوخوا دېرش کنلې جګړې کې د نورو زیانونو ترڅنګ، افغانستان ته یو بل اوښتی زیان دا بلل کیږي چې ډېر لرغوني اثار یې چور شول او په لرغونو سیمو کې زورواکانو ناقانونه کېندنې وکړي، چې ښايي لا هم په ځینو سیمو کې دغه ناقانونه کېندنې روانې دي .
