د کونړ ولایت په دانګام ولسوالۍ کې تېره شپه د سرحدي پولیسو د دریم کنډک پر قوماندان ماین چاودنه شوې چې له امله یې قوماندان سمونمل وليجان امرخیل له یو بل منصبدار سره وژل شوي دي.
په ختیځ زون کې د سرحدي لوا قوماندان ولي خان شینواري امریکا غږ ته وویل، دا چاودنه تېره شپه یوه بجه په داسې حال کې رامنځ ته شوې چې د دوی پولیس او منصبداران د دانګام ولسوالۍ ته نژدې د وهاب په نوم د سرحدي پولیسو یوې پوستې ته ختل.
نوموړی وايي چې د لارې په سر دغه ښخ شوي ماین د دریم کنډک قوماندان سمونمل وليجان امرخیل او یو بل منصبدار وژلي او یو عسکر یې ټپي کړی دی.
د کونړ د والي ویاند غني مصمم هم دا پېښه تاید کړې او وايي، د سرحدي پولیسو دغه منصوبین پیاده روان وو، چې ورباندې د ماین چاودنه وشوه.
تر اوسه کومې وسله والې ډلې ددغه ماین چاودنې مسولیت نه دی منلی.
دانګام د کونړ یوه له هغو ولسوالیو ده چې د ډیورنډ کرښې ته څیرمه پرته ده.
چارواکي وايي چې د کرښې له هغې غاړې نه په اسانۍ وسله وال دې غاړې ته راوړي او په حکومتي خلکو او ځایونو بریدونه کوي.
په دانګام ولسوالۍ کې د تېرو څو کلونو راهیسې له پاکستاني اړخه وخت ناوخته د توغندیزو بریدونو لړۍ لا تر اوسه هم نه ده ودرېدلې او چارواکي وايي چې دا توغندي ډېر کله په شاړو ځمکو کې لګېږي.