د کندهار ولایت د پوليسو چارواکي وايي چې د یو لړ پلټنو په لړ کې یې موندلې چې په یو شمیر کسان د پولیسو په لیکو کې کار کوي خو د شمولیت سم اسناد نلري.
ځايي چارواکي اندیښنه څرګندوي او وايي دغه ډول کسان ښايي پر پولیسو او نورو دولتي چارواکو په بریدونو کې لاس ولري.
پدې ترڅ کې یوازې د کندهار په میوند ولسوالۍ کې تر سلو زیات نارسمي کسان د پوليسو له لیکو ایستل شوي دي.
د کندهار د ۳ جنوبي ولسوالیو عملیاتي قومندان، سمونمل سلطان محمد، امریکا ږغ ته وويل چي له پولیسو شړل شوي کسان، د شخصي اړیکو پر اساس په دندو ګمارل شوي وو .
د دې ولایت په يو شمېر سيمو کي ډېري داسي پيښي رامنځ ته شوي، چي پوليس خپل قوماندان او ملګري وژلي او خپله له سیمي تښتېدلي وي .
ښاغلي محمد وویل "موږ دلته تر ۱۲۰ زیات هغه کسان چي د پوليسو په لیکو کې وو ، خو رسمیت يې نه درلود جواب کړه ، هغوی سوق نه وو ، غیري رسمي پوليس د مسئولیت احساس نلري او اصولو ته ژمن نه وي ، ممکن د دولت مخالف کسان هم له فرصت څخه استفاده وکړي."
تیره میاشت د میوند ولسوالۍ په کوکه سیمه کې دوو پوليسو پر خپلو نورو انډیوالانو برید وکړ او پنځه تنه یې ووژل او د هغوی وسلې يې له ځان سره وړي وې .
بل لور نه د زابل د ولایتي شورا غړي بیا دې ولایت ته هم د یاد بهیر د ور رسولو غوښتنه کوي او ادعا لري چي د زابل په ګڼو ولسوالیو کې د نارسمي پوليسو په شتون کې د هغوی سیمه ييز قومندانان هره میاشت په ميلیونونو افغانۍ اختلاس کوي.
د جنوبي ولایتونو اپراتیفي مشر ډګرجنرال عبدالرازق وايي چي دم ګړۍ د دوی ډیره پاملرنه د امنیتي ګواښونو مخ نیوي ته ده خو تر څنګ يې غواړي چي د جنوبي ولایتونو په کچه د امنيتي ځواکونو ترمنځ همږغي پياوړې کړي.
ښاغلي رازق وویل "د هلمند، کندهار ، زابل او نورو سیمو امیني ادارې په خپلو کې پر همږغۍ باندي په ګډه کار کوي، خو نوري ستونزي مو هم له پامه ندي وتلي."
سره له دې چي د داخلي بریدونو په اړه تازه موندنې ستونزه تر ډیره پوري په نارسمي پوليسو پوري تړلې ګڼي خو تر څنګ يې د سیمه ييزو چارواکو له لوري له سرتیرو سره ناسم چلند، لفظي شخړي او ځیني نور موضوعات د ورته ستونزو لاملونه بلل کیږي.
