د لاس رسي وړ اتصالات

پاکستان د افغان کډوالو د اوسېدو موده وغزوله


دا مهال شاوخوا ۱.۶ میلیونه افغان کډوال په پاکستان کې ثبت او راجستر دي

دا مهال شاوخوا ۱.۶ میلیونه افغان کډوال په پاکستان کې ثبت او راجستر دي

د پاکستان لپاره د افغانستان سفیر حضرت عمر زاخیلوال په خپل فیسبوک او ټویټر باندې لیکلي چې، د پاکستان حکومت په دغه هېواد کې د افغان کډوالو د اوسېدو موده د شپږو نورو میاشتو لپاره وغزوله.

نوموړي لیکلي " د پاکستان د صدراعظم ښاغلي نوازشریف د لارښوونې په بنسټ په پاکستان کی د میشتو افغان کډوا‌لو د ثبت د کارتونو موده چې سبا( پنجشنبه د جون ۳۰) ختمېده وغزیدله تر څو فرصت پیدا شي چی د مهاجرینو په اړوند ددواړو هېوادونو او نړیوالو تر منځ اساسي خبرې او پرېکړې وشی."

پدې وروستیو کې په پاکستان کې د افغان کډوالو سره د ناوړه چلند په اړه اندیښنې زیاتې شوې دي. تېره اونۍ د ملګرو ملتونو د کډوالو د چارو ادارې، یو ان اچ سي آر، پر پاکستاني چارواکو غږ وکړ چې د افغان کډوالو د زورولو د لړۍ مخه ونیسي.

په همدې حال کې په همدې ورځ راپورونه وايي چې شاوخوا ۵۰۰ افغان کډوال نیول شوي دي.

د خیبرپښتونخوا او بلوچستان ایالتونو ځينو چارواکو پدې وروستېو کې ویلي و چې افغان کډوال باید له پاکستان نه وشړل شي.

ملګري ملتونه وايي په خپله خوښه هر بېرته ستنېدونکي افغان ته ۴۰۰ ډالر ورکوي

ملګري ملتونه وايي په خپله خوښه هر بېرته ستنېدونکي افغان ته ۴۰۰ ډالر ورکوي

د خیبر پښتونخوا د اطلاعاتو سلاکار مشتاق غني ویلي وو چې د "افغان کډوالو له کبله د پاکستانیانو ژوند او کاروبار او امنیت خراب شوی دی".

ښاغلي مشتاق د مشال راډیو ته دا خبره هم کړې وه که"مرکزي حکومت افغان کډوال له پاکستان نه، نه شړي بیا دې په مشخصو کمپونو کې ځای پرځای کړي."

خو، د افغانستان دکډوالو او بېرته ستنېدو چارو وزیر سید حسین عالمي بلخي د امریکا غږ اشنا ته وویل " باید په پاکستان کې مېشت افغان کډوال د اسلام اباد او کابل د سیاسي اړیکو قرباني نشي". ښاغلي بلخي وویل چې اسلام اباد ورسره د کډوالو د اوسېدو د مودې د غزولو ژمنه کړې وه.

په همدې حال کې د ملګرو ملتونو د کډوالو عالي کمېشنرۍ هم د پاکستان پر حکومت په غیر رسمي ډول غږ کړی، چې د افغان کډوالو د قانوني اوسېدو نېټه دې وغزوي.

د دغې ادارې په یوې اعلامې کې دا خبره شوې چې عالي کمېشنر، فليپو ګراندي، د پاکستان، ایران او افغان چارواکو سره د افغان کډوالو پر مسئلې خبرې کړي دي.

د کډوالو او بېرته ستنېدونکو چارو وزرات وايي هغو کډوالو ته یې اسانتیاوې لا زیاتې کړې، چې په خپله خوښه هېواد ته ستنیږي. اعلامیه وايي په خپله خوښه هر ستنېدونکي ته " ۴۰۰ ډالره ورکول کیږي، چې مخکې ۲۰۰ ډالره وو."

دا مهال په پاکستان کې څه باندې دوه میلیونه افغانان د کډوالۍ ژوند کوي، چې ۱.۶میلیون یې ثبت او د اوسېدو قانوني اسناد لري.

  • 16x9 Image

    جعفر هاند

    جعفر هاند د هند په اندرا ګاندي پوهنتون کې په سیاسي علومو کې ماسټري کړې ده؛ د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی.

XS
SM
MD
LG