د لاس رسي وړ اتصالات

افغان کارگران په افغاني پاسپورت عربي اماراتو ته ځي


شاو خوا ۴٠٠ زره افغان کارگران په عزبي متحده اماراتو او سعودي عربستان کې په کار بوخت دي

شاو خوا ۴٠٠ زره افغان کارگران په عزبي متحده اماراتو او سعودي عربستان کې په کار بوخت دي

د افغانستان جمهوري ریاست وایي وروسته له دې افغان کارگران کولای شي مستقیماً په افغاني پاسپورتونو د کار لپاره عربي متحده اماراتو ته ولاړ شي. دا نوښت عربي متحده اماراتو ته د ولسمشر محمد اشرف غني له سفر وروسته رامنځ ته شو.

اکثر افغان کارگران اوس هم له بهرنیو پاسپورتونو په ځانگړې توگه د پاکستاني پاسپورت څخه په استفادې د کار کولو لپاره عربي هیوادونو ته ځي.

ولسمشر غني په عربي متحدهاماراتو کې د میشتو افغانانو سره په لیدنه کتنه کې په ابوظبی کې وویل چې دواړو هیوادونو موافقه کړې چې له دې وروسته افغان کارگران په افغاني پاسپورتونو عربي متحده اماراتو ته د کار لپاره ولاړ شي.

دکار، ټولنیزو چارو، شهیدانو او معلولینو وزارت سرپرست واصل نور مهمند وایي چې عربي متحده اماراتو ته په مستقیمه توگه د افغان کارگرانو د استولو لپاره له څو کالو راهیسې هڅې روانې وې.

ښاغلي مهمند زیاته کړه هغه افغانانچې الکترونیکي پاسپورتونو درلودونکي وي او د افغانستان د تابعت تذکره ولري او د کارگري مهارتونو تصدیق هم ولري په عربي متحده اماراتو کې د میشتو شرکتونو له لارې په قانوني توگه په کار گمارل کیږي.

ښاغلي مهمند زیاته کړه چې په دې اړه یو ځانگړی طرزالعمل هم تیار شوی او ټاکل شوې چې ژر د دواړو هیوادونو ترمنځ لاس لیک شي. هغه زیاته کړه چې د دې لارښود له مخې دوه تړونونه باید لاس لیک شي یو د دوو حکومتونو ترمنځ او بل د کار ورکوونکي شرکت او کارگر ترمنځ.

د ښاغلي مهمند په وینا په هغه صورت کې چې افغان کارگران په افغاني هویت بهر ته ولیږل شي، د افغانستان حکومت کولای شي د مشکلاتو په صورت کې د هغوی د ستونزو د حل کولو اقدام وکړي.

د افغانستان د حکومت له لورې د ورکړل شویو شمیرو له مخې همدا اوس نژدې ۴٠٠ زره افغان کارگر د خلیج او سعودي عربستان په هیوادونو کې په کار بوخت دي چې شاو خوا نیمایي یې په پاکستاني پاسپورت هغه هیواد ته تللي دي.

په دې ترڅ کې د افغانستان د سراسري کارگري اتحادیې رئیس محمد لیاقت عادل وایي په خلیج او عربي متحده اماراتو کې د افغان کارگرانو حقونه تر ډیره حده ضایع کیږي. هغه هیله څرگنده کړه چې دغه نوې پرمختیاوی به د افغان کارگرو لپاره آسانتیاوی برابرې کړي.

که څه هم چې د افغان کارگرانو دقیقه شمیره چې په بهر کې کار کوي او یا دا چې په افغانستان کې د بیکارۍ کچه څومره ده، نشته، خو د کار، ټولنیزو چارو ، شهیدانو او معلولینو وزارت د شمیرې له مخې په ټولیزه توگه په افغانستان کې ١٢ میلیونه کسان د کار وړتیا لري چې له دې جملې څخه څلورنیم میلیونه یې بې روزگاره دي.

د کار او ټولینیزو چارو وزارت ویاند وایي چې د څلورنیم میلیون کسانو له ډلې څخه یو میلیون یې په مطلقه توگه بیکاره دي او نور یې په قراردادي او موقتي کارونو بوخت دي چې لاس مزد یې د ژوندانه د پرمخ بیولو لپاره بسیا نه کوي.

  • 16x9 Image

    عارف عثمانزوی

    عارف عثمانزوی د رادیو، تلویزیون او ویب ژورنالیست دی. د څه دپاسه څلور لسیزو راهیسې یې د افغانستان ملي رادیو تلویزیون، جرمني رسنیو، آزادۍ رادیو او د امریکا غږ په مختلفو برخو کې کار کړی.

XS
SM
MD
LG