د لاس رسي وړ اتصالات

غني د خپل تره په ټاکلو کې پاتې راغلی


عبدالقيوم کوچی وايي، جمهور رئیس په پرېکړو کې پوره واک نه لري او ټول کارونه په خپلواکه توګه نشي ترسره کولای

عبدالقيوم کوچی وايي، جمهور رئیس په پرېکړو کې پوره واک نه لري او ټول کارونه په خپلواکه توګه نشي ترسره کولای

د جمهور رئیس تره عبدالقيوم کوچی وايي، چې جمهور رئيس محمد اشرف غني د چارو په ترسره کولو او دغه راز په پرېکړو کې پوره واک نه لري او نشي کولای، ټول کارونه په خپلواکه توګه پرمخ بوزي.

عبدالقيوم کوچي، چې د يوه پلاوي مشري يې کوله، دغه څرګندونې د پنجشنبې په ورځ په خوست کې يوې ولسي غونډې ته وکړې چې له دولت څخه د ملاتړ او د خلکو د غوښتنو د اورېدو په موخه شوې وه.

عبدالقیوم کوچي چې د جمهور رئیس له لورې په روسیه کې د سفیر په توگه مقرر شوی او تر اوسه نه دی توانیدلای چې په رسمي توگه دغه دنده ترلاسه کړي, د ملي يووالي حکومت ته په اشارې سره وويل، چې "جمهور رئيس غني په دولتي چارو کې د پرېکړو پوره واک نلري او حتی د مامورينو د استخدام پروسه يې هم له مداخلې خالي نه ده".

ښاغلي کوچي زياته کړه، چې د ځينو بهرنيو استختباراتي سازمانونو په ملاتړ په افغان حکومت کې دننه يو شمېر کړۍ هڅه کوي، چې د خپلو اهدافو په خاطر اوسنی نظام له پښو وغورزوي.

هغه ادعا وکړه چې "جمهور رئیس غني د هېواد د پرمختګ لپاره له ځان سره اوږمهاله پلانونونه لري، مګر ويې ويل، چې په تطبيق کې يې ورسره څوک پوره همکاري نه کوي".

هغه وويل: ”ولسمشر د يوې پيسې پوښتنه هم کوي، مګر په خواشينۍ سره څنګه چې لازمه ده، هماغسې ټيم ورسره نشته، خو د خوشحالۍ خبره داده، چې ولسونه اوس پوه شوي دي. په دغه نظام کې داسې هم کسان شته، چې نظام تخريبوي‟.

د جمهور رئيس تره او د هغه ځانګړي استازي عبدالقيوم کوچي له خلکو وغوښتل، چې له افغان دولت څخه پوره ملاتړ وکړي، چې په هېواد کې د پايدارې سولې او ثبات په رامنځته کولو بريالی شي.

هغه په تُنده لهجه په افغانستان کې پر ځينو رسنيو هم سخته نيوکه وکړه او د دښمنو رسنيو خطاب يې ورته وکړ، چې ګني له بهره تمويلېږي او افغان حکومت تخريبوي.

هغه وويل ” دې رسنيو ته هيڅ غوږ مه نيسئ، دا دښمنې رسنۍ دي، دا د ملت په خير نه دي، د نظام پايښت نه غواړي، دلته ابادي نه غواړي، د هرې رسنۍ شاته پردي ولاړ دي او پيسې ورکوي‟.

د قيوم کوچي ترڅرګندونو څو ورځې مخکې د ولسمشر لومړي مرستال جنرال عبدالرشيد دوستم بيا د خپلو پلويانو په يوه غونډه کې پر ولسمشر دا انتقاد کړی و، چې د هغه ټول صلاحيتونه او واکونه يې قبضه کړي دي.

په همدې حال کې د خوست د ولايتي شورا غړي قمرعلي لکڼوال د قيوم کوچي په مشرۍ له راغلي پلاوي نه په ټينګار سره وغوښتل، چې د دې ولايت د خلکو غوښتنې تر ولسمشره ورسوي او د عملي کولو لپاره يې جدي ګام واخلي.

غونډې ته ځينو نورو کسانو په خبرو کې پر حکومت غږ وکړ، چې د امنيت د ټينګښت لپاره په سرحدي سيمو کې امنيتي ځواکونه ښه تجهيز او په خپل وخت اکمال کړي.

XS
SM
MD
LG