د لاس رسي وړ اتصالات

د افغانستان د حکومت د سیاسي اپوزیسیون مُعما

  • اکمل داوی

Afghan president and CEO of his government

Afghan president and CEO of his government

د افغانستان د ملي وحدت د حکومت یوه څرگند ځانگړتیا د یو مشخص سیاسي اپوزیسیون نه لرل دي. داکتر عبدالله عبدالله چې دمخه د حکومت د اپوزیسیون د مشر موقف درلود اوس د ملي وحدت د حکومت اجرائیه رئیس دی او نیمه کابینه هغه ټاکلې ده.

که څه هم چې د ملي وحدت حکومت د رامنځ ته کیدو راهیسې زیات منتقدین درلودلي دي، خو نیوکې تر ډیره انفرادي او د یوې منسجمې سیاسي هستې په نشتوالي کې د اپوزیسیون په بڼه شوې دي.

د افغانستان پخوانی ولسمشر حامد کرزی او د هغه د حکومت یو شمیر مقاماتو او د ملي وحدت د حکومت یو شمیر سیاستونه په ځانگړې توگه پاکستان ته په نژدیوالي یې نیوکې کړې دي. لږ تر لږه د د تیر حکومت دوو لوړپوړو مقاماتو د کورنیو چارو پخواني وزیر محمدعمر داوودزي، او د ملي امینت پخواني سلاکار رنگین دادفر سپنتا، په کورنیو او بهرنیو ورځپاڼو کې د د جمهور رئیس غني پر بهرني سیاست نیوکې کړې دي.

په دې ترڅ کې د مارشال قسیم فهیم د تلین د درناوي په مراسمو کې ډاکتر عبدالله په غیر مستقیمه توگه له ښاغلي کرزي وغوښتل چې د دولت د سیاسي اپوزیسیون د مشر موقف غوره نه کړي.

خو حامد کرزي ویلي دي چې سیاست ته د بیا مخه کولو سره مینه لري. ښاغلي کرزي تیره اونۍ د سي ان بي سي تلویزیوني شبکې ته وویل "ما خپل وخت تیر کړی. [سیاست] ته زما بیا مخه کول هم ماته او هم افغانستان ته به یوه ناکامي وي. مونږ باید د افغانانو نوی نسل ولرو. مونږ باید نوي جمهور رئیسان ولرو او د اساي قانون لړۍ باید دوام وکړي، نه دا چې په ټپه ودریږي.".

پخواني جهادي مشران

د ملي وحدت د حکومت د منتقدینو دوهمه ډله په ځانگړې توگه د واک د ویش د مسلو په اړه، یو شمیر پخواني جهادي مشران دي. د هغوی په منځ کې عبد رب رسول سیاف او محمد اسماعیل خان له نورو څخه زیاتې نیوکې او گیلې لري.

یو شمیر پخواني جهادي مشران

یو شمیر پخواني جهادي مشران

اسماعیل خان تر دې چې د ملي وحدت د حکومت کابینه "کمونیست او دوه تابیعته" گڼلې ده.

د ملي امینت د عمومي ریاست پخوانی رئیس امرالله صالح، چې د جمهوري ریاست په انتخاباتو کې یې د ډاکتر عبدالله ملاتړ کړی و اوس ځان د حکومت "سیاسي او مدني فعال او اپوزیسیون" شمیري.

ښاغلي صالح د امریکا غږ ته وویل "زه د دې دولت د سترو سیاستونو چې دولت داري، بهرنی سیاست او د جگړې د ستونزې د حل لارې چارې دي، د نظر جدي اختلاف لرم".

جمعیت اسلامي، حزب وحدت اسلامي، حزب اسلامي (له گلبدین حکمتیار څخه جلا شوې ډله) او نورې مخکنۍ جهادي ډلې چې په یو ډول د واک په ویش کې برخه لري، خو تر اوسه یې په نوي حکومت لږ تر لږه په علني توگه انتقاد نه دی کړی.

د اپوزیسیون د رئیس ټاکل؟

د افغانستان د ملي وحدت د حکومت د موافقې څلورم بند چې د جمهوري ریاست د انتخاباتو د دوهم پړاو د دوه سیالانو او د امریکا د بهرنیو چارو د وزیر په میانځگړیتوب لاس لیک شوه، د هیواد د دوهم سیاسي جریان د مشرۍ ټاکل د جمهور رئیس له صلاحیتونو او د "دولتي امتیازاتو" مستحق گڼلی دی.

د افغانستان د حکومت د اجرائیه رئیس ویاند مجیب الرحمن رحیمي، د امریکا غږ ته وویل چې د ملي وحدت د حکومت سره د ډاکتر عبدالله د یوځای کیدو شرط د دوو امیتازونو ترلاسه کول وو: لومړی د اجرائیه ریاست او دوهم د دوهم سیاسي جریان مشري.

ښاغلي رحمیي وویل "مونږ د یو جریان په توگه چې د اجرائیه ریاست مو ترلاسه کړی طبیعي ده چې د اصلاحاتو او همپالنې د جریان د جوړیدو او د یو داسې حرکت د شکل نیولو په اړه چې د حکومت دننه دی او د حکومت همکار دی، مونږ کار کړی دی او طرحه یې بشپړه شوې ده".

دا چې د دوهم سیاسي جریان مشر به په دقیقه توگه کومې دندې ولري، تر اوسه څرگندې نه دي خو ځنې خلک د اپوزیسیون په نامه د یوې منظمې سیاسي کتلې نه شتون په افغانستان کې دموکراسۍ ته زیان گڼي.

د افغانستان د انتخاباتي شکایتونو د خپلواک کمیسیون رئیس عبدالستار سعادت، وایي د سیاسي اپوزیسیون نشتوالی "د نظام طبیعي حالت" تر پوښتنې لاندې راوړی دی.

ښاغلي سعادت د امریکا غږ ته وویل "زما په اند داسې بریښي چې هم جمهور رئیس او هم اجرائیه رئیس خپل [سیاسی] ټیمونه له لاسه ورکړي دي او په راتلونکې کې لومړی د کوچنۍ ډلې او بیا د یو غښتلي سیاسي اپوزیسیون د جوړیدو احتمال موجود دی".

XS
SM
MD
LG