د لاس رسي وړ اتصالات

په راتلونکو دوو کلونو کې به افغانستان له ترکمنستان سره د رېل کرښې په واسطه ونښلول شي. د فوايد عامې وزير نجيب الله هوژن او د بلخ والي عطا محمد نور په مزارشريف كې په يو ګډ خبري کنفرانس کې د بلخ او ترکمنستان تر منځ د رېل کرښې د جوړېدو د کار د پيل يادونه وکړه او زياته يې کړه چې د امو سيند پر څنډه د بلخ ولايت له کلدرا ولسوالۍ څخه تر ترکمنستان پورې د ۳۳۰ کيلو متره د رېل کرښې د جوړېدو چارې پيل شوې.

د ريل دغه کرښه به د بلخ له کلدار ولسوالۍ څخه پيل کيږي، له شبرغانه به تېرېږی او د فارياب ولايت د اقينې بندر له لارې به ترکمنستان ته رسېږي.

د فوايد عامې وزير وويل، چې د رېل دغه کرښه به د اسيايي بانک لخوا د ۴ ميليارده امريکايي ډالرو په ارزښت په راتلونکو دوه کلونو کې جوړه او ګټې اخيستنې ته چمتو شي. نوموړي زياته کړه، چې د يادې کرښې په جوړېدو به افغانستان د ترکمنستان له لارې د منځنۍ اسيا هېوادونو ته لاره پيدا کړي:،،د ريل د كرښې عملي كارونه تقريبا پيل شوي همدا اوس پيل شوي دي مونږ ددغې پروژې د جوړيدو پر وړاندې كومه ستونزه نه وينو مګر ددغې پروژې له مالي اړخه بايد مطمين او سو چې تر ډيره يې ستونزه حل ده چې د اسيايي بانك له خوا وركول كيږي. او له امنتي اړخه هم مطمين يم ځكه د ريل دغه كرښه چې د خلكو له سيمو تيريږ هغوي به ترې ساتنه كوي.،،

د هغه په وينا له دې سره به د کار د زمينې د پيدا کېدو سربېره د افغانستان سوداګري په ګړندۍ توګه پرمختګ وکړي.

كه د افغانستان او تركمنستان تر منځ د ريل دغه كرښه وغځول شي د خلكو لپاره به كار هم پيدا شي او ترڅنګ به يې د سوداګرو مالونه هم په ارزانه بيه افغانستان ته راورسيږي، اوس مهال له اروپا يي هيوادونو څخه د سوداګرو مال له يوې مياشتې څخه په كمه موده كې نه شي رارسيداي خو كه د ريل دغه كرښه جوړه شي نو له اروپا څخه به د سوداګرو توكي په لسو ورځو كي راورسيږي.

د بلخ والي عطا محمد نور هم د افغانستان او ترکمنستان تر منځ د ريل کرښه د افغانستان د سوداګرۍ د ښه کېدو لپاره له ټولو ښه لاره وبلله. او زياته يې كړه چي دوي غواړي په افغانستان كې سوداګريز مركز جوړ كړي او زياته يي كړه: ،، كه يو سوداګريز مركز دلته جوړ شي او نړيوال سوداګر راجذب كړاي شو او د سوداګريزو موادو لپاره دا سيمه يو مركز شي نو اروپا خليج فارس روسيه او جنوبي اسيا له دي سيمې وصليداي شي، چي دا سيمه به د سوداګرو لپاره د پام وړ وي.،،

د يادولو وړ ده، چې له دې مخکې هم د ازبکستان او افغانستان تر منځ د حيرتان بندر له لارې د رېل کرښه غځېدلې ده. دغه کرښه، چې د حيرتان بندر او مزراشريف ښار تر منځ ۷۹ کيلومتره اوږده غځيدلې ده، له تېر يو کال را په دې خوا يې چارې بشپړې شوي دي.

ګل رحیم نیازمن، مزارشريف
XS
SM
MD
LG