د لاس رسي وړ اتصالات

پاکستان د سپین بولدک – چمن سرحد بیرته پرانیسته


افغان سرحدي چارواکي وایي دوی ته لا هم د پاکستان د سرحدي ځواکونو له خوا د دغه سرحد د تړلو علت څرګند نه دی.

افغان سرحدي چارواکي وایي دوی ته لا هم د پاکستان د سرحدي ځواکونو له خوا د دغه سرحد د تړلو علت څرګند نه دی.

د کندهار د والي ویاند صمیم خپلواک امریکا غږ اشنا راډیو ته وويل، دوی لاهم د پاکستاني نظامیانو له لورې د د سپین بولدک او چمن تر منځ د لویې لارې د تړلو په اړه معلومات نه لري او زیاته یې کړه، چې د افغانستان د بهرنیو چارو وزارت له لورې په دې باب په کابل کي د پاکستان له سفارت سره خبرې شوي چې په ترڅ کې یې نن لار پرانیستل شوه.

دغه راز د سپين بولدک ولسوال حاجي سیدعلي امریکا غږ اشنا راډیو ته وويل، چي دا لار نن د ورځي له پيل راهیسی پرانیستل شوې او تګ راتګ ورباندې جریان لري.

څلور ورځي مخکې پاکستاني نظامیانو د چمن او سپین بولدک ترمنځ د دوستۍ په نوم دروازه د هر راز تګ راتګ پر مخ وتړله.

په کندهار کې افغان سرحدي چارواکي وايي، د دوی استخباراتي معلومات ښيي چي پاکستان غواړي له دې لارې پر افغان حکومت فشار راوړي، تر څو د سپين بولدک او چمن ترمنځ د دوستۍ په نوم دروازه په رسمیت وپيژني.

افغان حکومت دغه دروازه په رسمیت نه پيژني او ادعا کوي، چي پاکستان دا دروازه شاوخوا ۱۵ کاله مخکې د ډیورنډ کرښي له صفري نقطې څخه ۲۰ کیلو میتره دننه د افغانستان په خاوره کې جوړه کړې ده.

پاکستاني چارواکو لا تر اوسه د دغې لارې د تړلو او د افغان حکومت د ادعاوو په اړه څه نه دي ویلي.

هر ورځ زرګونه کسان افغانستان او پاکستان ته پر دغې لارې تګ راتګ کوي.

په کندهار کې د سوداګرۍ خونو مسئولین وايي، چي په تیرو ۴ ورځو کي د لارې د بندیدو له کبله افغان سوداګرو ته د وارداتي سبزیو او ژر خرابیدونکو توکو د دریدو له کبله په میلیونو افغانۍ مالي تاوان هم اوښتی دی.

  • 16x9 Image

    عزیزالله پوپل

    عزیزالله پوپل په جنوبي ولایتونو کې د امریکا غږ اشنا راډیو د پښتو خبریال دی. له امریکا غږ سره د کار له مخه یې په سیمه کې له ملي راډیو او ټلویزیون، روز خبري اژانس، هیواد ټلویزیون او افغان ازاد راډیو سره د خبریال په حیث کار کړی، او د کندهار په پوهنتون کې یې د ادبیاتو زده کړې ترسره کړې دي

XS
SM
MD
LG