اروپا کې میشت د مختلط مهاجرت مرکز (ایم ایم سي) په یوه خپره کړې سروې کې ویلي چې پر افغانستان باندې د طالبانو د بیا واکمنیدو وروسته ددغه هیواد څخه ترکیې ته د افغان میرمنو د کډه کیدو اصلي علت د خپلو حقونو او ازادیو څخه د هغوی محرومیدل دي.
په دغه سروې کې چې د ۲۰۲۱ کال د اګست د میاشتې څخه د ۲۰۲۳ کال د سپټمبر ترمیاشتې پورې د ۹۹۴ افغان میرمنو سره د مرکو پر اساس ترتیب شوې، ددغه شمیر ۴۹۸ تنه یې افغانستان کې واک ته د طالبانو د بیا رسیدلو وروسته ترکیې ته ګډه شوي دي.
د سروې موندنې ښيي چې د ۲۰۲۱ کال د اګست د میاشتې وړاندې چې ترکیې ته کومو ښځو کډه کړې، د هغوی ۳۹ سلنه یې کډوالې، ۱۵ سلنه یې د کډوالۍ غوښتونکې، ۲۲ سلنه یې په دغه هیواد کې یا دایمي او یا هم په موقتي ډول د اوسیدلو اسناد درلودل، خو ۴۷ سلنه ښځو چې د ۲۰۲۱ کال د اګست وروسته یې دغه هیواد ته کډه کړې، د نامنظم وضعیت د درلودلو یادونه کړې ده.
د مختلط مهاجرت مرکز ویلي:" د طالبانو تر واکمنۍ وروسته ترکیې ته د کډه شویو افغان میرمنو د زیاتو ازادیو او حقونو څخه محرومیت د کډوالۍ د اصلي عامل په توګه یاد کړی دی. د ۲۰۲۱ کال د اګست وروسته زیاتو ځواب ویوونکو افغان میرمنو د جنسیت پر بنسټ تبعیض[افغانستان څخه] د وتلو د علت په توګه یاد کړی دی."
همداشان ددغې سروې د موندنو پر اساس وروسته له هغې چې طالبانو پر افغانستان باندې بیا واک ترلاسه کړ، ۷۶ سلنه ښځو د ځمکې له لارې له افغانستان څخه وتلي دي چې ددې دمخه دا شمیر ۶۶ سلنه وو.
په دې سروې کې ویل شوي:" کیدای شي چې ددې علت پر ښځو باندې په الوتکو کې د سفر پرمهال د نارینه محرم د نشتون له امله اوسي."
په دې سروې کې د خوندیتوب په برخه کې خطرونه د ۲۰۲۱ کال د اګست وروسته د اکثرو میرمنو له خوا چې له افغانستان څخه وتلي ترکیې ته د افغان میرمنو د کډوالۍ د یو بل علت په توګه یاد شوی دی.
اروپا کې میشت د مختلط مهاجرت مرکز (ایم ایم سي) ویلي چې ۴۴ سلنه ښځې چې د ۲۰۲۱ کال د اګست وروسته ترکیې ته تللي د طالبانو له خوا د نیولو د اندیښنو او په همدې شمیر نورې د فزیکي تاوتریخوالي له امله کډه کیدو ته اړې شوې دي.
خو دا شمیر د هغو میرمنو ترمنځ چې پر افغانستان باندې د طالبانو د بیا واکمنیدو دمخه ترکیې ته تللي په ترتیب سره ۳۱ او ۳۸ سلنه وو.
دغه مرکز ویلي چې په ترکیه کې د میشتو افغان میرمنو ترمنځ د روغتیا، حفظ الصحې، اړیکو ته د لاس رسي او بیرته ستنیدلو په برخه کې مرستو ته اړتیاوې شته دي.
ددغه مرکز د سروې له مخې ۳۱ سلنه ښځو ویلي چې خپلو ځانونو او بچیانو لپاره یو خوندي چاپیریال ته اړتیا لري او ۴۸ سلنه نورو د بیا میشتیدو په برخه کې د مرستو اړتیا یادونه کړې ده.
په دې سروې کې د بیا میشت کیدو په برخه کې د ملګرو ملتونو د کډوالو د عالي کمیشنرۍ او د ترکیې د کډوالو د ادارې مرستو ته د افغان میرمنود اړتیاو یادونه شوې ده.
د مختلط مهاجرت مرکز شمیرنې ښيي چې اوس مهال په ترکیه کې شاوخوا ۱۴۰ زره افغان کډوال دیره دي چې ۳۵ سلنه یې ښځې او ماشومان دي.
د ۲۰۲۱ کال د اګست په میاشت کې په افغانستان کې واک ته د طالبانو د بیا رسیدلو وروسته په سلګونو زره افغانان د طالبانو د غچ اخیستلو د اندیښنو او د ښځو او نجونو پر زده کړو او کار د بندیزونو په ګډون د یو شمیرعواملو له امله دغه هیواد څخه ګاونډیو او د ترکیې په ګډون د سیمې هیوادونو ته کډه کړې ده.
فورم \ دبحث خونه