د اتریش صدراعظم ورنر فیمن وایي هیواد به یې د خپلو پولو په اوږدو کې په لا نورو جدي اقداماتو لاس پورې کړي چې "اقتصادي پناه غوښتونکي" بیرته وشړي تر څو د مهاجرت عمومي کچه ټیټه شي.
په سلگونو زره کډوال چې په منځني ختیځ، افغانستان اونورو سیمو کې د جګړو او فقر له وجې په تیښته کې دي تیر کال جرمني ته د رسیدو په هیله اتریش ته ننوتي دي.
د اتریش د کورنیو چارو وزارت په وینا ددغو کډوال څخه شاوخوا نوي زرو یې په ٢٠١٥ کال کې په اتریش کې پناه غوښتې ده. دغه شمیره د ٢٠١۴ کال په پرتله درې ځله ډیره و. د اتریش ټول نفوس اته نیم میلیون دی.
د اتریش صدراعظم ورنر فیمن د کرون نومې اترشي ورځپاڼې سره په مرکه کې ویلي دي چې غواړي د جرمني سره په گډه داسې تګلاره خپله کړي چې "اقتصادي کډوال" بیرته ولیږي او په دې توگه د مهاجرو شمیره راکمه کړي.
ښاغلي فیمن ویلي دي چې اتریش د قانوني چوکاټ د موندلو په لټه کې دی چې د جگړو څخه د تښتیدونکو او د هغو مهاجرو ترمنځ توپیر وشي چې د اقتصادي لاملونو په وجه راغلي دي.
د اتریش صدراعظم د زیاتو مهاجرو د منلو له تصمیم وروسته د خپل ایتلافي حکومت دننه د محافظه کارو او ښې اړخه گوندونو تر فشار لاندې دی.
تیره میاشت ښاغلي فیمن ویلي وو چې اتریش باید د هغو مهاجرو بیرته استول چټک کاندي چې د پناه غوښتنې شرایط یې نه دی پوره کړي.
بل لور ته د جرمني په څو ښارونو کې د نوي کال په درشل کې پر ښځو باندې بریدونو چې پولیس یې شک پر مهاجرو کوي، اعتراضونه رامنځ کړي دي او د جرمني صدراعظمه انگیلا مرکل او د هغې د آزدو دروازو پالیسي یې تر فشار لاندې راوستې ده.