د لاس رسي وړ اتصالات

بنگله دېش د جماعت اسلامي مشر اعدام کړ


مطیع الرحمان نظامي پنځم جگپوړی سیاستوال دی چې د ٢٠١٣ کال راهیسي په دا ځړول کیږي

مطیع الرحمان نظامي پنځم جگپوړی سیاستوال دی چې د ٢٠١٣ کال راهیسي په دا ځړول کیږي

د بنگله دیش د جماعت اسلامي د گوند مشر مطیع الرحمان نظامي په ١٩٧١ کال کې د پاکستان څخه د خپلواکۍ په جگړه کې د بنگله دیشیانو پر وژلو تورن شوی وو او محکمې په اعدام محکوم کړی وو.

د کورنیو چارو وزیر اسدالزمان نن سهار وویل چې ٧٣ کلن مطیع الرحمان نظامي نن سهار وختي د ډهاکې په زندان کې اعدام شو.

د بنگله دیش حکومت د پاکستان څخه د ازادۍ په نهه میاشتنۍ جگړه کې د جنگي جرمونو د څیړنې د پاره یوه اختصاصي څارنوالۍ جوړه کړې ده او د هغو کسانو د دوسیو څیړنه کوي چې د پاکستاني پوځ سره پر همکارۍ تورن شوي دي.

ښاغلی نظامي د ازادۍ د جگړې پر مهال د جماعت اسلامي ځوانانو د تنظیم غړی وو او د پاکستاني پوځ سره په گډه د بنگله دیشانو په وژلو تورن وو.

اختصاصي محکمې په اتو پیښو کې مجرم وبللو، خو ده د هیڅ یو جرم اقرار ونکړ.

بنگالیانو په ١٩٧١ کال کې د یوې خونړۍ په ترڅ کې له پاکستان څخه خپلواکي واخیسته

بنگالیانو په ١٩٧١ کال کې د یوې خونړۍ په ترڅ کې له پاکستان څخه خپلواکي واخیسته

بنگله دیش وایي چې پاکستاني سرتیرو د مطیع الرحمان په څیر د خلکو په مرسته، ٣ میلیونه بنگله دیشیان وژلي وو، په ٢ لکه ښځو یې جنسي تیری کړی وو او ١٠ میلیونه خلک یې بې کوره کړي وو.

د جگړې په پای کې پاکستانی پوځ تسلیم شو او بنگله دیش د ازادی اعلان وکړ چې تر هغې مخکې ختیځ پاکستان وو.

ښاغلی نظامي پنځم جگپوړی سیاستوال وو، چې د ٢٠١٣ کال راهیسي په دا ځړول کیږي. تر دې مخکې د جماعت اسلامي ٣ نور غړي او یو د پخوانۍ صدراعظمې خالده ضیا د گوند غړی اعدام شوی وو.

د بخښنې نړیوال سازمان او د بشري حقونو د څار ډلې ددې مذهبپاله سیاستوال اعدامول غندلي دي او د محاکمې پر شفافیت یې نیوکې کړي دي، خو حکومت وایي چې په عدلي او قضایي چارو هیڅ ډول نیمگړتیا نه وه او ټول قانوني اصول په پام نیول شوي دي.

XS
SM
MD
LG