په نایجیریا کې د اوو کلنو شخړو په اوږدو کې تر اتلس زرو ډیر کسان وژل شوي دي.
دغه کسان د بوکوحرام ترهګرې ډلې او د نایجیریا د حکومتي ځواکونو په جگړو او ددې ډلې په ترهگرۍ کې وژل شوي دي.
د بوکوحرام ترهګره ډله د نایجیریا په شمال کې د خپل حاکمیت د ټنیګښت په موخه له غیر شرعي تګلارو څخه ګټه اخلي. د غربیانو په څیر جامه په تن کول، له دیني زده کړو پرته د عصري علومو زده کول او ډېر نور کارونه حرام بولي او هغو کسانو ته سخته سزا ورکوي چې لدغو مواردو سرغړونه وکړي.
د بوکوحرام تر ولکې لاندې سیمو کې ددغې ډلې له تاوتریخوالو او وحشت څخه ويډیو یا عکس اخیستل آسانه چاره نه ده، ځکه دغه ډله د خپلو جنګیالیو د ځاي او ځایګي او د هغوي په لاس د کېدونکو زورزیاتیو په پټ ساتلو کې شهرت لري.
خو امریکا غږ داسې ویډیوګانې ترلاسه کړي چې د بوکوحرام ډلې لخوا ثبت شوي دي. ویډیوګانې د بوکوحرام پر ډلې د یو برید په پایله کې له یو کمپیوټر څخه ترلاسه شوي دي.
په نایجیریا کی د بوکو حرام ترهګرې ډلی د دین او مذهب په نوم د مرګ او ورانیو لویې نښې پریښودلي دي.
خو د اسلام په څېر د سولې دین څنګه دغه ډول وحشت ته اجازه ورکوي؟
پام مو وي چې د بې دفاع نایجیریایانو پر وړاندې د بوکوحرام ډلې د ظلمونو په اړه د رئپوټو د لړۍ په دویمه برخه کې ځینې صحنې زړه لړزونکې دي.