د لاس رسي وړ اتصالات

په دبۍ کې د برج خلیفه سیاله ودانۍ جوړیږي


ددې نوې ودانۍ د جوړولو لگښت شاوخوا یو میلیارد ډالر سنجول شوي دي.

ددې نوې ودانۍ د جوړولو لگښت شاوخوا یو میلیارد ډالر سنجول شوي دي.

دغه نوې ودانۍ به گرځنده برنډې ولري او حتی په ډیرو لوړو پوړونو کې به یې بوټي او گلان کرل شوي وي چې د ودانۍ د جوړونکو په وینا د بابل د ځوړنده باغونو څخه یې الهام اخیستی دی.

د "املاک اعمار" شرکت رئیس محمد العبار د یکشنبې په ورځ په دوبۍ کې وویل چې دغه نوی برج به د برج خلیفه څخه چې د ښار تر ټولو لوړه ودانۍ ده، لوړه وي. د خلیفه برج ۸۲۸ متره لوړوالی لري.

د برج خلیفه برخلاف، دغه نوۍ ودانۍ به سنتي ډوله نه وي بلکې په خپلو ټولو پوړونو کې به باغ او باغچې ولري او د ښاغلي العبار په وینا یو مجلل هوتل، سیار رستورانونه او شیشه یی برندې چې د دې برج د دوال بهر به گرځي ددې ودانۍ له ځانگړتیاو څخه دي.

ددې ودانۍ د جوړولو لگښت شاوخوا یو میلیارد ډالر سنجول شوي دي چې په شپږ کیلومیتره مربع ساحه کې د "دوبۍ نهر" په څنډه کې جوړیږي. د دبۍ نهر د ژویو د ژوند یوه له محفوظو ساحو څخه ده چې د فلامینگو او نورو ډول ډول سمندري الوتونکو د جذبولو لپاره ښه زمینه لري.

ښاغلي العبار دغه نوې ودانۍ د ٢١ پیړۍ د ایفل برج وگاڼه چې نه یواځې د سیلانیانو د جلبولو لپاره ښه انگیزه کیدای شي بلکې د هغه په وینا د املاکو د مشتریانو لپاره به ښه بازار وي.

دغه ودانۍ اسپانوي الاصله سویسي مهندس سنتیاگو کالاتراوا والس، طرحه کړې چې ټاکل شوی په ٢٠٢٠ کال کې د دوبۍ د نړیوال نندارتون سره جوخت پرانستل شي.

له بلې خوا په شیکاگو کې میشت د لوړو ودانیو او د ښاري اوسیدنې شورا وایي چې دغه نوې ودانۍ به له دې سره سره چې دلوړوالي له درکه به دبرج خلیفه نه لوړه وي، خو نشو کولای چې هغه د نړۍ تر ټولو لوړه دوانۍ وگڼو.

باید د یوې ودانۍ هر پوړ لږ تر لږه په سلو کې ٥٠ د اوسیدنی لپاره وي چې وکړای شي د نړۍ د لوړو ودانیو په کتار کې ځای ونیسي. د لوړو ودانیو او د ښاري اوسیدنې شورا دمخابرې او څارنې برجونه چې د ودانیو په لوړو څوکو کې ځای ولري او د استفادې زمینه ترې کمه وي د ودانیو د لوړوالي په سنجولو کې شامل نه گڼي.

په هر حال برج خلیفه تر ډیرې مودې پورې د نړۍ تر ټولو لوړه ودانۍ نه پاته کیږي او ټاکلر شوی چې ژر تر ژره یو بل آسمان خراش د ۱۰۰۰ مترو په لوړوالي د عربستان په جده ښار کې جوړ شي.

راپور: د اسوشیتدپرس اژانس

ژباړه: عارف عثمانزوی

XS
SM
MD
LG