د لاس رسي وړ اتصالات

په داسي حال کې چې پوځ او اخوان المسلمین ګوند دواړه هڅه کوي چې خپل قوت او ولسي ملاتړ ښکاره کړي، په مصر کې مظاهره چیان د قاهرې په لارو کوڅو کې خپاره شوي دي چې د یوه بل پرضد مظاهرې وکړي.

د راپرځول شوي ولسمشر پلویان د جمعې په ورځ د قاهرې د نصر په ښار کې چې د اخوان المسلمین ګوند یو قوي مرکز ګڼل کېږي، د رابعه الاداویه د جومات د باندي راټول شوي وو. دغه ګوند د ټویټرس له لارې د مرسي د پلویانو انځورونه په ټول هېواد کې خپاره کړل.

ریپوټونه خپاره شوي چې د مرسي د زرګونو طرفدارو او مخالفو مظاهره کونکو ترمنځ نښتې شوي دي.


دا په داسي حال کې ده چې د پوځ لوی درستیز عبدالفتاح السیسي پر ټولو مصریانو باندې غږ کړی دی چې لارو کوڅو ته دي په مظاهرو راووځي چې د هغه په وینا د ترهګرۍ او تشدد پر خلاف د نوموړي مبارزې ته مشروعیت ورکړل شي.


مظاهرې په داسي حال کې وشوې چې د مصر یوه قاضي امر وکړ چې د معزول شوي ولسمشر محمد مرسي بند دي د دسیسې د جوړولو په تور ادامه پیدا کړي.


د مینا رسمي خبري آژانس وویل چې مرسي د ۱۵ ورځو دپاره په توقیف کې ساتل کېږي. نوموړی د جولای د دریمې نېټې راهیسي د پوځ په بند کې دی. هغه د پوځ د مداخلې په لړ کې د قدرت څخه ایسته شو.

د محمد مرسي ولسمشري او وروسته د هغه راپرځولو د مصر ټولنه ویشلې ده. محمود محمود د هغو زرګونو مظاهره کونکو په ډله کې دی چې د تحریر څلور لارې ته د مظاهرو لپاره ځي. هغه داسي وايي:،،مونږ ټول باید لارو کوڅو ته راووځو چې د جنرال سیسي د غوښتنې ملاتړ وکړ او تشدد و ترهګري وغندو. نن ورځ زمونږ د پاڅون د تکمیلیدو ورځ ده.،،


خو زیات شمیر اسلام پاله مصریان بیا د جنرال سیسي غوښتنه د اخوان المسلمین پرضد د تشدد ډکو حملو پيل ګڼي.

ددغو مصریانو له ډلې څخه یو یوصري رابعه نومېږي. هغه داسي وايي: ،،جنرال سیسي د خلګو څخه اجازه غواړي چې خلګ په خپلو مینځونو کې جګړې سره وکړي. داسي به ونسي ځکه مصریان اوس د ټولو مسایلو څخه باخبره دي.،،

په عین حال کې تحقیق کونکي اوس دا سپړي چې آیا ښاغلي مرسي د حماس د ډلې او نورو اسلام پالو مشرانو سره مرسته کړې ده چې په ۲۰۱۱ کال کې د حسن مبارک د راپرځیدو پرمهال د بند څخه وتښتي که نه؟


د ښاغلي مرسي د اخوان المسلمین ګوند وايي چې محلي اوسیدونکو د بندیانو په آزادیدو کې مرسته کړې ده خو د قاهرې یوه محکمه بیا څیړنې کوي چې دا په ډاګه کړي چې ښاغلي مرسي خو به د حماس د ډلې سره مرسته نه وي کړې چې د پولیسو پر ماموریتونو باندي بریدونو وکړي او بندیان آزاد کړي. دا له معلومه نه ده چې پر مرسي باندي به تورونه ولګېږي که نه؟
XS
SM
MD
LG