د لاس رسي وړ اتصالات

ترهګرو ډلو په ټولنیزو شبکو کې خپل کمپاین پراخ کړی دی


په دې وروستیو کې په نړۍ کې د ترهګرو او نورو جهادي ډلو ټپلو د خپلو پیغامونو د رسولواو خپلو لیکو ته د نورو خلکو د جلبولو لپاره له ټولنیزو رسنیو لکه فیسبوک، ټویټراو انستګرام څخه ډېره ګټه اخیستې ده.

خو اوس دغو جهادیانو د خپلو تبلیغاتو د پراخولو او خپرولو لپاره د موسیقۍ یوې تر ټولو مشهورې نړیوالې شبکې سونډ کلوډ ته هم مخه کړه ده.

سونډ کلوډ د جرمني په برلین ښار کې د سندرو د خپرولو یوه غږیزه شبکه ده چې په نړۍ کې د میاشتې ۱۷۵ میلیونه اورېدونکي او لیدونکي لري.

په دې وروستیو اوونیو کې د القاعدې شبکې ځینو غړو او د اسلامي دولت د ډلې ځینو پلوویانو پر دغې شبکې خپل تبلیغاتي ویناوې، ترانې او نور اړوند مواد خپاره کړي دي چې د سونډ کلوډ شبکې مینوال یې په اسانۍ اورېدلی شي.

جهادي ډلې خپل تبلیغاتي پیغامونه پر ټویټر او تصویرونه بیا پر انستګرام خپروي او خپل پلویان او خواخوږي هم هڅوي چې د دوی پیغامونه او تصویرونه د ټولینزو شبکو له لارې له نورو سره شریک او خپاره کړي.

دوی له همدې لارې ځانونو ته پراخ کمپاین کوي.

دغو جهادیانو په سونډ کلوډ شبکې کې د القاعدې د وژل شوي مشر اسامه بن لادن او د یوبل جهادي مشر شیخ انور الاولکي ځینې ویناوې او پیغامونه هم خپاره کړي دي. الاولکي په ۲۰۱۱ کال کې د امریکا د یوې بې پیلوټه الوتکې په برید کې ووژل شو.

جهادي ډلې خپل تبلیغاتي پیغامونه پر ټویټر او تصویرونه بیا پر انستګرام خپروي او خپل پلویان او خواخوږي هم هڅوي چې د دوی پیغامونه او تصویرونه د ټولینزو شبکو له لارې له نورو سره شریک او خپاره کړي

جهادي ډلې خپل تبلیغاتي پیغامونه پر ټویټر او تصویرونه بیا پر انستګرام خپروي او خپل پلویان او خواخوږي هم هڅوي چې د دوی پیغامونه او تصویرونه د ټولینزو شبکو له لارې له نورو سره شریک او خپاره کړي

د دې ترڅنګ جهادیانو په سونډ کلوډ کې د اسلامي دولت د مشر ابوبکر البغدادي ځینې ویناوې او د دغې ډلې د خلافت په پلوۍ ویل شوې ترانې هم خپرې کړي دي.

اسلامي دولت چې وړاندې د داعش په نامه هم پېژندل کېده د سوریې په ختیځ او د عراق په لویدیځ کې یې خپل خلافت اعلان کړی او د دغې ډلې مشر ابوبکر البغدادي ځان د مسلمانانو خلیفه بولي.

د منځني ختیځ د مطبوعاتو د څېړنو امریکا مېشتی انستیتوت له هغې وروسته دغه خبرې ته متوجه شو چې دغو ترهګرو په ټویټر کې د سونډ کلوډ د شبکې یو داسې لینک خپور کړې چې په کې جهادي ویناوې او ترانې وې.

د سونډ کلوډ شبکه په ۲۰۰۷ کال کې د هغو ځوانو سندرغاړو او هنرمندانو لپاره جوړه شوه چې خپلې نوې سندرې او کمپوزونه په کې وړیا خپاره کړي.

د منځني ختیځ د مطبوعاتو د څېړنو د انستیتوت مشر سټیف سټالنسکي وايي " د عراق او سوریې په روانې جګړې کې له ټولنیزو رسنیو څخه د نړیوال جهاد د فعالیتونو د ښودلو لپاره کار اخیستل کیږي او دغه کار د انټرنټ او امریکا مېشتو ټولنیزو شبکو په واسطه کیږي. "

نوموړی وايي جهادیان ټولنیزې رسنۍ یوازې د خپلو کمپاینونو او خپلو لیکو ته د نورو خلکو د راماتولو لپاره نه کاروي، بلکې د پېسو د راټولولو، خپلو پلانونو او ایډیالوژۍ د اعلانولو او له خپلو کورنیو سره د اړیکو ساتلو لپاره یې هم کاروي.

دی وايي ډېر نور خلک د عراق په نی نوا ښار کې د اسلامي دولت د البیان راډیو ځینې خپرونې هم پر سونډ کلوډ خپروي چې نور یې هم واوري.

تېره اونۍ د برتانیا د برېښنايي پټ څار د اژانس مشر روبرټ هنیګان خبرداری ورکړ چې د لویديځ وړیا ټکنالوژۍ د اسلامي دولت او نورو اورپکو ډلو سره مرسته کوي چې پرمختګ وکړي، ده د ټکنالوژۍ سترې کمپنۍ تورنې کړې چې دغې برخې ته یې پام نه دی کړی.

د برتانیا د فایننشل ټایمز ورځپاڼې په یوې نظر پوښتنې کې هنیګان ویلي دې چې د ترهګرو لپاره د امریکا د ټکنالوژۍ کمپنۍ یو ښه انتخاب دی چې په خپلې ګټې یې وکاروي.

ښاغلي هنیګان دا نه دي ویلي چې د جهاديانو د تبلیغاتو د مخنیوي لپاره له انټرنټي کمپنیوڅه ډول مرسته غواړي.

د منځني ختیځ د مطبوعاتو د څېړنو د انستیتوت د موندنو له مخې په سونډ کلوډ کې د جهاديانو اکاونټونه خورا زیات دي او ورځ تر بلې زیاتیږي.

په دغې ډلې کې یوه هم د ګوربه په نامه یوه پاڼه ده چې د اسلامي دولت له لوري د اعلان شوي خلافت په ملاتړ جهادي ترانې او ویناوې خپروې.

په دغې پاڼې کې چې ۵۰۰ سوه کسان یې تعقیبوي د ترانو او ویناوو ۳۲ دېرش داسې غږیزې بستې یا کڅوړې شته چې د ۱۰۰۰۰- ۳۰۰۰۰ ترمنځ جهادي ثبتې شوې ویناوې او ترانې لري.

همدغه یو شمېر نورې وېبپاڼې بیا د القاعدې د مشر ابو مصعب الزرقاوي په ګډون د دغې ډلې د وژل شویو کسانو په ویر ویناوې او نور مواد خپروي.

د انټرنټ پر کمپنیو نیوکې کیږي چې په ټولنیزو شبکو کې د جهاديانو د موادو او نورو موضوعګانو د خپراوي په مخنيوي کې پاتې راغلي دي، خو د فیسبوک او ټویټر ادارو ویلي چې دوی په ترهګریزو شبکو پورې تړلې سلګونه پاڼې بندې کړي او پر دغې برخې کلک څار لري.

XS
SM
MD
LG