د لاس رسي وړ اتصالات

ناپیژنده وسله‌ والو په غزني کې ۱۲ مسافر تښتولي


تیرو دریو میاشتو کې درې ځلې ناپیژانده وسله والو په غزني ولایت کې په لویه لاره مسافر تښتولي چې ښځې او ماشومان هم په کې شامل دی

تیرو دریو میاشتو کې درې ځلې ناپیژانده وسله والو په غزني ولایت کې په لویه لاره مسافر تښتولي چې ښځې او ماشومان هم په کې شامل دی

د غزني ولایتي چارواکي وایي، تیره ورځ ناپیژنده وسله والو د دغه ولایت د قره باغ ولسوالۍ د دښتې په سیمه کې دولس مسافر له موټر کوز کړي او له ځان سره یې نامعلوم ځای ته بیولي دي.

د غزني د والي مرستیال محمد علي احمدي امریکا غږ ته وویل، دا دولس مسافر د دغه ولایت د جاغوري ولسوالۍ اوسیدونکي وو، چې ګیلان ولسوالۍ ته په لاره له دوه سراچو موټرو راکښته او تښتول شوي دي.

ښاغلي احمدي وویل "موږ ته د رسیدلو راپورونو له مخې تیره ورځ د قره باغ د ولسوالۍ د دښتې په سیمه کې وسله والو دوه سراچې موټر درولي او بیا یې هغوی د غزني ولایت د ګیلان ولسوالۍ ته یوړل".

ښاغلي احمدي وویل وسله والو د دغو دوه موټرو څخه سړي تښتولي خو ښځې او ماشومان یې پریښي دي.

د غزني د والي مرستیال وویل، تښتول شوي مسافر ټول د دغه ولایت د جاغوري ولسوالۍ اوسیدونکي دي.

د غزني د ولایت د والي مرستیال په دغه پیښه کې د اسلامي دولت د جنګیالیو د لاس لرلو احتمال هم رد نه کړ او وې ویل، کیدای شي دا ډله په دغه پیښه کې لاس ولري.

د بلې خوا د جاغوري ولسوال امریکا غږ سره په خبرو کې وویل چې د تښتول شوو مسافرو له ډلې دوو یې د سړي تښتوونکو له منګلو ځان خلاص کړی او په تیښته بریالي شوي دي.

تر اوسه کومې ډلې ددغو مسافرو د تښتولو مسولیت په غاړه نه دی اخیستی.

تیره ورځ د غزني ولایتي چارواکو امریکا غږ ته وویل چې د وسله والو یوې ډلې په دغه ولایت کې د یو انجنینر په ګډون څلور ملکي وګړي چې درې یې ډرائیوران وو، د تښتولو او د دریو ورځو لپاره په بند کې د ساتلو وروسته تیره ورځ وژلي او مړي یې په سړک اچولي دي.

نږدې څلور میاشتې وړاندې هم د غزني د ګیلان په ولسوالۍ کې څلور مسافر چې دوه ښځې یو ماشوم او یو ډرائیور وو نامعلومو وسله والو تښتولي او له تراوسه یې څرک نه دی لګیدلی.

د غزني د ولایت جاغوري، مالستان او ناهور ولسوالۍ د دغه ولایت د امنیت له پلوه په مصؤنو ولسوالیو کې شمیرل کیږي او د دغه ولایت د نورو ولسوالیو پرخلاف په کې مخالف وسله وال اصلآ شتون نه لري.

XS
SM
MD
LG