د لاس رسي وړ اتصالات

وسله‌والو کسانو په غور کې شپږ کسه تښتولي


دوه اونۍ مخکې هم په غور ولایت کې یوې وسله‌والې ډلې، نږدې دیرش کسان په ډله ایزه توګه وژلي وو.

دوه اونۍ مخکې هم په غور ولایت کې یوې وسله‌والې ډلې، نږدې دیرش کسان په ډله ایزه توګه وژلي وو.

د غور ولایت سیمه ایز چارواکي وايي، یو شمیر وسله‌والو چې ځانونه د داعش ډلې غړي بولي تیره ورځ یې د دغه ولایت شپږ اوسیدونکي تښتولي دي.

د غور والي غلام ناصر خاضع امریکا غږ ته وویل، دغه شپږ تنه د غور ولایت د مرکز فیروز کوه له کاسي کلي څخه په پټیو کې د بزګرۍ پر مهال تښتول شوي دي.

د غور والي وویل "لا تر اوسه د هغوی د برخلیک په اړه معلومات نشته، خو په دې برخه کې تحقیقات پیل شوي دي".

په غور کې د تښتونې دغه پیښه په داسې حال کې رامنځ ته شوې، چې دوه اونۍ مخکې هم د دغه ولایت په مرکز کې نږدې دیرش تنه ملکي کسان د یوې وسله‌والې ډلې له خوا لومړی وتښتول شول او له هغې وروسته په ډله ایزه توګه ووژل شول.

د افغانستان ولسمشر تیره ورځ په غور کې د دغو قُربانیانو له کورنیو سره د لیدلو پر مهال ژمنه کړې، چې د دغې پېښې له عاملینو څخه به د هغوی د عزیزانو د وینې غچ بیرته واخلي.

که څه هم لا تر اوسه د دغو شپږ تنو د تښتولو مسؤولت کوم چا یا ډلې په غاړه نه دی اخیستی خو د غور والي وايي، چې ښايي دا کار هم د هغو کسانو له خوا شوی وي، چې دوه اونۍ مخکې یې په دغه ولایت کې نږدې دیرش تنه ملکي کسان ووژل.

XS
SM
MD
LG