د لاس رسي وړ اتصالات

پاکستان کې د ګرمۍ له کبله د مړو شمېر له زرو واوښت


په پاکستان کې داسې مهال ګرمۍ څه باندې ۴۵۰ مړه کوي، چې یوه میاشت مخکې په هند کې هم ګرمې هوا شاوخوا ۲۰۰۰ کسانه مړه کړل

په پاکستان کې داسې مهال ګرمۍ څه باندې ۴۵۰ مړه کوي، چې یوه میاشت مخکې په هند کې هم ګرمې هوا شاوخوا ۲۰۰۰ کسانه مړه کړل

په پاکستان کې د سختې ګرمۍ له کبله د مړو شویو کسانو شمېر د چهارشنبې په ورځ ۷۵۰ ته لوړ شو. چارواکي وايي چې ډېر کسان د پاکستان په سویلي او لوی تجارتي ښار کراچۍ کې مړه شوي دي.

خو، اوس هوا څه ناڅه یخه شوې ده، بادونه الوتي، د تودوخې درجه له شاوخوا ۴۵ څخه ۳۸ راټېټه شوې ده او د هوا پېژندنې ادارې د باران وړاندوینه هم کړې ده.

د چهارشنبې په ورځ د کراچۍ د ښار سړکونه تر ډېره تش لیدل کېدل، حکومت عمومي رخصتي اعلان کړې وه چې خلک له کورونو څخه را ونه وځي.

په روغتونو کې لا هم بېړنی حالت دی، ډاکټرانو د زرګونو ګرمۍ وهلیو په درملنې بوخت دي.

چارواکو خبرداری ورکړی چې ښايي د مړو شمېر لا پسې لوړ شي. د کراچۍ د عامې روغتیا د وزارت یو لوړ پوړي مقام وویل " وروستۍ شمېره دا ده چې ۷۵۰ کسان مړه شوي دي، خو دا د تېرې شپې ارقام دي. "

د سه شنبې په ورځ د کراچۍ یو روغتیايي چارواکي صابر میمون د فرانسې خبري اژانس ته ويلي وو چې په ښار کې د تودوخې درجه ۴۵ ته ختلې ده.

ګرمۍ داسې مهال په پاکستان کې سلګونه کسان مړه کوي چې د نړۍ د نورو مسلمانو هېوادونو په څېر په پاکستان کې هم میلیونه انسانان روژه نیسي چې په کې له پېشنمي وروسته تر روژه ماتې پورې خوراک او څښاک منع دي.

د کراچۍ د روغتون یو ډاکټر سمیع جمال تېره ورځ وویل چې تر دې دمه یې شاوخوا ۳۰۰۰ ګرمۍ وهلیو درملنه کړې ده.

ښاغلي جمال وویل " په دغو کسانو کې څه باندې دوه سوه کسان یې په روغتون کې مړه شول." یو بل چارواکي وویل چې ۶۷ کسان بیا د ښار په ملکي روغتون کې مړه شول.

په پاکستان کې د یوې تر ټولو لویې خیریه ټولنې ایدهي چارواکي وايي چې د دوی د مړو د ساتلو په دوو مرکزونو کې څه باندې ۴۰۰ مړي پراته دي.

د دغې ټولنې ویاند انور کاظمي وویل " په دریو ورځو کې زموږ د مړو د ساتلو په مرکزونو کې تر ۴۰۰ ډېر مړي راوړل شوي دي. نور په مرکز کې د مړو د اېښودلو ځای نشته. "

ګرمۍ د پاکستان لوی ښار کراچۍ ځپلی دی او د تودوخې درجه په کې ۴۵ ته ختلې ده.

ګرمۍ د پاکستان لوی ښار کراچۍ ځپلی دی او د تودوخې درجه په کې ۴۵ ته ختلې ده.

په کراچۍ کې شاوخوا ۲۰ میلیونه انسانان ژوند کوي، دغه ښار د څښاک د اوبو او برېښنا له کموالي سره هم مخامخ دی.

د هوا پېژندنې د ادارې یو چارواکي وویل چې د سه شنبې په ورځ د تودوخې درجه ۴۴.۵ وه او شاید وروسته بادونه والوزوي.

د ښار چارواکو د سه شنبې په ورځ عمومي رختصي اعلان کړه چې خلک د باندې را ونه وځي، ډېر مړه شوي کسان مزدورکاران دي چې په لارو او سړکونو کې یې کار کاوه.

په پاکستان کې د طبیعي حالاتو سره د مبارزې اداره وايي چې د ښار په ټولو روغتونو کې به د ګرمۍ وهلو د درملنې مرکزونه پرانیستل شي چې په وخت سره د ناروغانو درملنه وشي.

په پاکستان کې ګرمۍ داسې مهال سلګونه کسان مړه کوي چې، د دغه هېواد په ګاونډ هند کې شاوخوا یوه میاشت مخکې هم سختې ګرمۍ ۲۰۰۰ کسان مړه کړل.

په هند کې د ګرمۍ له لاسه مړه کېدوونکي کسان غریبکاران دي، خو سږنۍ شمېره د دغه هېواد په تاریخ کې د ګرمۍ له کبله د مړه شویو کسانو دویمه لوړه شمېره بلل کیږي.

XS
SM
MD
LG