د لاس رسي وړ اتصالات

د هلمند والي: سنګین کې لا هم جګړه روانه ده


د تیرو دریو ورځو د هلمند د سنګین په ولسوالۍ کې افغان امنیتي ځواکونه او طالبان په جګړه بوخت دي.

د تیرو دریو ورځو د هلمند د سنګین په ولسوالۍ کې افغان امنیتي ځواکونه او طالبان په جګړه بوخت دي.

د هلمند والي میرزاخان رحیمي امریکا غږ اشنا راډیوته وویل چې د سنګین ولسوالۍ ټول دولتي تاسیسات دافغان امیتي ځواکونو په لاس کې دي خوهغه دا ومنله چې افغان ځواکونه د طالب وسله والو سره د دغې ولسوالۍ د مرکز په څنډو کې په جګړه بوخت دي.

ښاغلي رحیمي وویل چې هوايي ځواکونو او ځانګړو قطعاتو په سنګین او ګرشک ولسوالیو کې د خپلو مخالفانو ځیني اهداف په نښه کړي چې په ترڅ کې یې د افغان حکومت وسله والو مخالفینو ته مرګ ژوبله اوښتې ده.

د هلمند والي وویل چې خپلو مخالفانو ته د سر د اوړیدلي زیان په باب به رسنیو ته وروسته معلومات ورکړي.

هغه وویل د مخالفو وسله والو پر وړاندې په روانوعملیاتو کې د وسله والو مخالفانو د پرمختګ مخه ډب شوې ده.

د سنګین په ولسوالۍ کې د افغان پوځ د ضربتي قواوو یوه مقام د نوم نه ښودلو په شرط امریکا غږ اشنا راډیو ته وویل چې د سنګین په جګړه کې تر اوسه ۴۲ تنه افغان سرتیري او ۷۶ وسله وال طالبان وژل شوي دي.

د هلمند والي دغه ولایت ته د برتانوي پوځونو د بیرته ستنیدلو په باب خپاره شوي رپوټونه و نه منل او وې ویل چې تر اوسه پورې دغه ولایت ته برتانوي عسکر بیرته نه دي ورستانه شوي.

د هلمند امنیه قومندان جنرال عبدالرحمن سرجنګ امریکا اشنا رادیو ته وويل چې ځانګړي امریکايي ځواکونه د ښوراب پوځي اډې ته څو اونۍ مخکې ورغلي او د خانشین د بیرته نیولو په عملیاتو کې يې افغان ځواکونو ته هوايي ملاتړ برابر کړی وو.

د هلمند والي میرزاخان رحیمي وايي چي د نړیوالو ځواکونو څخه د مرستې غوښتولو صلاحیت د امنیت شورا سره دی او دوی په ولایتي کچه دا کار نشي کولای.

وسله والو طالبانو د هلمند د سنګین ولسوالۍ په اړه تر اوسه کومه تبصره نده کړې .

  • 16x9 Image

    عزیزالله پوپل

    عزیزالله پوپل په جنوبي ولایتونو کې د امریکا غږ اشنا راډیو د پښتو خبریال دی. له امریکا غږ سره د کار له مخه یې په سیمه کې له ملي راډیو او ټلویزیون، روز خبري اژانس، هیواد ټلویزیون او افغان ازاد راډیو سره د خبریال په حیث کار کړی، او د کندهار په پوهنتون کې یې د ادبیاتو زده کړې ترسره کړې دي

XS
SM
MD
LG