د هنګري صدراعظم ویکتور اربن نن یکشنبې وویل که چیرته ولس د هغه د حکومت د نیول شوي دریځ په پلوې رایه ورنکړه، هغه به استعفا ورکړي. د هنګري حکومت غواړي د اروپایي اتحاد لخوا د پناه غوښتونکو جبري سهمیه بدله کړي.
صدراعظم اربن دا خبره نن په همدې موضوع په هنګري کې د عمومي نظرپوښتنې یا ریفرنډم کې د رایي ورکولو وروسته وکړه. داسی اټکل شوی و چې نن به اته اعشاریه دری میلیون خلک د سهار شپږو نه تر ماښام اوه بجو پورې پدې ریفرنډم کې رایه ورکړي.
ددی ریفرنډم پوښتنه داده چې، آیا غواړئ د هنګري له اتباعو پرته، نور خلک په جبري توګه، حتی د پارلمان له موافقې پرته، په هنگري کې ځای پرځای شي؟
په رایګیري کې /نه/ ویل د حکومت د دریځ پلوي څرګندوي او داسی تمه کیږي چې شاید په لوی اکثریت رایه ورکوونکي د حکومت ملاتړ وکړي، خو شک پدې کې دی چې که پدې رایګیري کې ګډون کوونکي د حکومت د دریځ تطبیقولو لپاره، تر پنځوس فیصدو ډیره رایه جوړه کړي.
سره لدې چې دا ریفرنډم د اروپایي اتحاد لپاره کومه اړینه پایله نلري، خو صدراعظم اربن هیله من دی چې لدې لارې کیدی شي په بروکسل فشار زیات کړي.
هغه وایي راتلونکې اونۍ به د خبرو لپاره بروکسل ته لاړ شي او کوشش به وکړي چې که د شوې نظرپوښتنې د نتیجې پر أساس ورسره د هغو خلکو په نه منلو کې همکاري وکړي چې د هنګري ولس يي نه غواړي.
ښاغلی اربن چې غواړي د اروپایي اتحاد هر غړی هیواد د تصمیم نیونکو پریکړو په برخه کې انفرادي صلاحیت ولري، وایي پدې هیله دی که په نورو هیوادونو کې هم د مهاجرینو د سهمیې اخستو په اړه همداسی نظرپوښتنه وشي.
ددی ریفرنډم جلا، د صدراعظم اربن د حکومت پرضد د اروپایي اتحاد د عدالت غوښتنې په محکمه کې هم شکایت ثبت شوې ځکه د اروپایي اتحاد د ۲۰۱۵ کال پریکړې پراساس یي هغه ۱۶۰ زره پناه غوښتونکي ندي ځای پرځای کړي چې د یونان او ایټالیې نه يي انتقال کړي وو.
د احصایو جوتیږي چې د اتباعو جدي غوښتنه کیږي ترڅو د همدې ریفرنډم له لارې بروکسل ته داسی پیغام ولیږي چې د مهاجرینو سره د همکارۍ ترڅنګ په هنګري کې د تروریزم له ویرې زیاتیدو سره ملت پالنې هم زور آخستې.
د هنګري د برحاله حکومت سیاسي مخالفینو نن د رایه ورکوونکو غوښتل چې په ریفرنډم کې برخه وانخلي.
یوازی په ۲۰۱۵ کال کې نژدې ۴۰۰ زره مهاجرین د هنګري له لارې لویدیځې اروپا ته ننوتي.
هنګري تیرکال د پناه غوښتونکو اتیافیصده هغه عریضې رد کړې چې په هنګري يي کې پناه غوښتله. تراوسه هنګري ۵۰۸ مهاجرینو ته د قبلیدو پناه ورکړې ده، ۲۹۱۷ درخواستونه يي رد کړي دي او ۳۷ زره نورې عریضې لاهم تر ارزونې لاندې دي چې رد یا پناه به ورکړي.
