د کندهار يوه کورنۍ چې د ښه ژوند په نیت اروپا ته روانه شوې وه، بېړۍ يې په سمندر کې ډوبه شوه؛ د هغوی مړي د یکشنبې په شپې په کندهار کې خارو ته وسپارل شول.
د پنځو غړو دغه کورنۍ د کندهار ښار په څلورمې ناحيې کې اوسېدله.
دوی یوه میاشت مخکې د اروپا په نیت له کندهار څخه ووتل.
د کور مشر نوید نومېده چې له خپلې مېرمنې او درې اولادونو سره یو ځاې ډوب شول.
نوید درې لورګانې درلودلې؛ خپلوان يې وايي د هغه د دوو اولادونو مړي لا هم موندل شوي نه دي.
د نوید د خاله زوی محمد زاهد وايي چي هغه پر ډېرو پېچلو او خطرناکو لارو تر ترکيې پوري ځانونه رسولي وو.
د نوید خپلوان اروپا ته د افغانانو تګ يو مجبوريت بولي.
د یو شمېر کارپوهانو په باور بې روزګاري او نا امني هغه دوه لويې ستونزې دي چې ورځ تر بلې يې بهر ته د افغانانو په خاص ډول د ځوانانو د ورتګ ذهنیت غښتلی کوي.
د افغانستان د باندنیو چارو وزیر دوه اوونۍ وړاندې وویل چې سږ کال شاوخوا ۱۴۰ زره افغانان د اروپا په لور په ناقانونه کډوالۍ تللي دي.
تیر کال هم څه باندې ۸۰ زرو افغانانو په ۲۷ اروپايي هیوادونو کې د کډوالۍ غوښتنه کړې وه.
