د لاس رسي وړ اتصالات

ایران ومنله چې افغانستان ته یې پیسې ورکړي


ایران ومنله چې افغانستان ته یې پیسې ورکړي

ایران ومنله چې افغانستان ته یې پیسې ورکړي

ایران اعتراف کړی چې د افغانستان حکومت ته یې د کلونو راهیسې په دې منظور پیسې ورکړي چې د دې جنگ ځپلي ملک په بیا ودانولو کې مرسته کړې وي.

د ایران د بهرنیو چارو د وزارت ویاند رامین مهمانپرست نن وویل چې ایران د گاونډي ملک افغانستان د سولې او ثبات په اړه اندیښنه لري او خپلې مرستې ته به دوام ورکړي.

د افغانستان جمهور رئیس حامد کرزي پرون وویل چی د هغه حکومت د ایران نه د پیسو کڅوړې ترلاسه کړي دي او وایي چې دا د مرستې یو شفاف ډول دی.

ښاغلي کرزي وویل چی دغه پیسې پټې یا غیر معمول نه وې او د امریکا په شمول د نورو انډیوالو ملکونو نه مو چې کومې پیسی ترلاسه کړي، دې پیسو د هغو نه چندان تفاوت نه درلود.

ښاغلي کرزي د نیویارک ټایمز د ورځپاڼې د هغه رپوټ په ځواب کې خبرې کولې چې لیکلي یې وو د هغه د دفتر رئیس عمر داودزي ته ایران پیسې ورکوي چې په افغانستان کې د ایران د منافعو دفاع وکړي.

امریکا وایی چی دایران د کړو نه تشویش لری ځکه چی په سیمه کی د بی ثباتنۍ د اچولو سابقه لري.

د بهرنیو چارو د وزارت ویاند فلیپ کرولي وویل چی واشنگټن د ایران په دی حق چی د افغانستان سره مرسته وکړی او یا د افغانستان د حق په اړه چی هغه ومنی کوم سوال نه دی مطرح کړی.

ښاغلي کرولي وویل چی امریکا هم افغان چارواکیو ته نغدي پیسې ورکړي دي، خو د پیسو د ورکولو دا طریقه په دی وروستیو کلونو کی تر ډیره حده پوری له مینځه وړل شوې ده.

د سپینی ماڼۍ ویاند بیل برتن وویل چی نړیواله ټولنه کاملآ حق لری چی په افغانستان کی د ایران د مداخلی په اړه اندیښنه ولري.

د امریکا یوی معتبری ورځپاڼی رپوټ ورکړی و چی د افغانستان جمهور ریس او د هغه دفتر د خارجی ملکونو ورکړل شوی نغدی پیسی د پارلمان غړو ، قومی مشرانو او حتی طالبانو ته ورکوی چی د هغوی وفاداری تر لاسه کړي.

نیو یارک ټایمز د یو شمیر منابعو له قوله چی نومونه یی نه دی خپاره کړی لیکلی چی ایران د خپل نفوذ نه کار اخلی چی د افغانستان ، ناتو او امریکایی انډیولانو ترمینځ درز واچوي.

خو ښاغلي کرزي وویل چی ایران په دی خاطر پیسی ورکوی چی غواړی د افغانستان سره ښی اړیکی ولري.

په افغانستان کی د ایران سفارت پرون د ورځپاڼی دغه رپوټ بی اساسه او توحینو آمیزه وباله.

د ایران پارلمان نن د ایران د بهرنیو چارو په وزیر منوچهر متکی باندی غږ وکړ چی پارلمان ته راشی او د دغی موضوع وضاحت وکړي او افغانستان ته د دی پیسو د مقدار او علت په اړه تشریحات ورکړي.

XS
SM
MD
LG