د لاس رسي وړ اتصالات

ایران د امریکا د پهلوانۍ ټیم ته ویزه ورنکړه


د امریکا د پهلوانۍ ټیم د ١٩٩٨ راهیسې تل د غیږې نیولو په دغو نړیوالو لوبو کې گډون کړی دی

ایراني مقاماتو د امریکا د متحده ایالاتو د غیږې نیولو ټیم د ایران په نړیوال جام کې له گډون منع کړ.

ایران وایي د امریکا د متحده ایالاتو د پهلوانۍ ټیم ته یې اجازه نه ده ورکړې چې د آزادې غیږې نیولو په نړیوال جام کې گډون وکړي چې د ایران په کرمانشاه ولایت جوړېږي.

ایران وایي دا کار یې د امریکا د جمهور رئیس دونالد ټرمپ د هغه فرمان په غچ کې کړی دی چې امریکا ته یې د ایرانیانو په ورتگ بندیز لگولی دی.

د غیږې نیولو دغه نړیوال جام چې خورا مشهور دی د فبرورۍ په ١٦ او ١٧ په کرمانشاه کې کیږي. د امریکا د پهلوانۍ فدراسیون د دوشنبې په ورځ ویلي وو چې متحده ایالات به دغو لوبو ته یوه لوبډله واستوي.

د رویترز اژانس وایي د امریکا د پهلوانۍ ټیم چې د ١٩٩٨ راهیسې یې تل په دغو لوبو گډون کړی دی، نن د جمعې په ورځ په دې اړه د دوی پوښتنې ته ځواب نه دی ویلی.

د ایران د بهرنیو چارو وزارت ویاند بهرام قاسمي د ایران دولتي تلویزیون ته ویلي دي چې "د امریکا د نوې ادارې د ویزې د پالیسۍ په وجه مونږ د هغوی د پهلوانانو د راتگ د مخنیوي پرته بل کوم انتخاب نه لرو."

د امریکا د جمهور رئیس د یو اجرائیه فرمان له مخې د اوو هیوداونو وگړو ته چې اکثریت نفوس یې مسلمانان دي د امریکا د ویزې ورکول منع کړي دي. تهران دمخه ویلي وو چې ددغه بندیز په غبرگون کې به ایران هم په امریکایي وگړو ویزه بنده کړي.

XS
SM
MD
LG