ایراني مقاماتو ویلي دي چې سږکال به ددې هیواد حاجیان حج ته لاړ نه شي.
ایران ویلي دي چې تیر کال د سعودي عربستان د "بی کفایتۍ" له وجې د کعبې په انگړ کې ساختماني کرنونه راوپرزیدل او د مینا په ښار کې حاجیان تر پښو لاندې شول. ایراني مقاماتو ویلي دي چې په دې پیښه کې ۴۶۴ ایراني حاجیان مړه شوي وو.
د ایران د فرهنگ او اسلامي ارشاد وزیر علي جنتي د هغه هیواد دولتي اژانس ایرنا ته ویلي چې د څو میاشتو راهیسې د روغې جوړې د خبرو هڅې وشوې خو تر اوسه یې کومه نتیجه نه ده ورکړې.
ښاغلی جنتي ادعا کوي چې "خرابکاري د سعودي له خوا ده" او زیاتوي چې "هغوی زمونږ د ویزو یا امنیت او د ایراني حاجیانو د لیږدونې په اړوند زمونږ وړاندیزونه ونه منل".
ایران د حج مناسکو ته د حاجیانو د نه لیږلو پریکړه په داسې حال کې کوي چې اوس هم ددغو دوو سیمه ییزو ځواکمنو هیوادونو ترمنځ فضا د شیعه روحاني شیخ نمر باقر النمر د اعدامولو په خاطر خړه پړه ده.
د شیخ نمر اعدامیدل چې عربستان خطرناکه ترهگر باله په ایران کې د پراخو مظاهرو سبب شو او قهرجنو مظاهره کوونکو په تهران او مشهد کې د سعودي عربستان پر سفارت او قونسلگرۍ بریدونه وکړل. ددې پیښو په نتیجه کې د ریاض او تهران ترمنځ دیپلوماتیکې اړیکې وشلیدې.
په ایران کې د سعودي د دیپلوماتیکو دفترونو له تړلو وروسته، د سعودي عربستان مقاماتو له ایراني حاجیانو غوښتي چې د ویزې د اخیستلو لپاره په نورو هیوادونو کې د سعودي سفارتونو ته مراجعه وکړي.
دا لومړی ځل نه دی چې ایراني حاجیان د حج په مناسکو او مراسمو کې برخه نه اخلي. په ۱۹۸۷ کال کې د ایراني حاجیانو او د سعودي عربستان د بلوا ضد پولیسو ترمنځ په تاوتریخوالي کې ۴۰۲ تنه ووژل شول. دغه پیښه ددې سبب شوه چې ایراني حاجیان په پرله پسې توگه په ۱۹۸۸ او ۱۹۸۹ کلونو کې د حج په مراسمو کې گډون ونه کړي.