د لاس رسي وړ اتصالات

تهران هم ایران ته د امریکایانو په ورتګ بندیز لګوي


د شنبې په ورځ د ایران ولسمشر وویل چې اوس د ملتونو ترمنځ د دیوالونو د جوړولو وخت نه دی.

په تهران کې چارواکي وايي ایران به هم دغه هېواد ته د امریکایانو په ننوتلو بندیز ولګوي.

تهران دا اقدام له هغه وروسته کوي چې د امریکا ولسمشر ډونالد ټرمپ په یو تازه فرمان کې امریکا ته د ایران په ګډون د اوو مسلمانو هېوادونو د وګړو پر راتګ بندیز ولګوه.

د ایران د بهرنیو چارو وزارت په اعلامیې کې ویل شوي " ایران د امریکا خلکو ته احترام لري او د امریکا د حکومت د سختې پالیسۍ او خلکو ترمنځ توپیر کوي، خو د امریکا له لوري پر ایرانیانو د سخت بندیز په غبرګون کې به بالمثل عمل کوي او دا کار به د امریکا د دغه بندیز تر لېرې کېدو پورې روان وي".

د رویټرز خبري اژانس وایي په اعلامیه کې دا هم ویل شوي" امریکا ته د مسلمانانو په ورتګ بندیز، د مسلمانانو، اسلامي نړۍ او په خاص ډول د ایران ولس ته سپکاوی او افرطیانو ته یوه ښه ډالۍ ده".

خو په اعلامیه کې ویل شوي نه دي چې دا بندیزونه به کله پیلیږي.

د ښاغلي ټرمپ دغه فرمان پر نورو مسلمانانو سربېره شاوخوا یو میلیون امریکايي-ایرانیانو ته هم لویې ستونزې جوړې کړي دي.

تر دغه اقدام مخکې د ایران ولسمشر حسن روحاني ویلي وو چې اوس د ملتونو ترمنځ د دیوالونو جوړولو وخت نه دی، چې اشاره یې د ولسمشر ټرمپ هغه پلان ته وه، چې غواړي له مکسیکو سره پر سرحد لوی دیوال جوړ کړي.

د ولسمشر ټرمپ د نوي فرمان په اساس د ایران، عراق، سوریې، لیبیا، سومالیا، سوډان او یمن وګړو باندې د څلورو میاشتو خو د سوریې پر وګړو تر نامعلوم وخت پورې امریکا ته د ننوتلو بندیز لګول شوی دی.

د دې تر څنګ، د رویټرز د خبري اژانس د راپور له مخې هغه خلک چې په امریکا کې د دایمي اوسېدو اسناد ( ګرین کارت) لري هم په دغو بندیزونو کې شامل دي. په دې مانا چې دوی به هم په دغې مودې کې امریکا ته نشي راتلی.

XS
SM
MD
LG