د لاس رسي وړ اتصالات

داعش ادعا کړې چې د اچین په برید کې یې هیڅ زیان نه دی لیدلی


د افغانستان دفاع وزارت ادعا کړې چې په دغه برید کې د داعش د دیارلسو قوماندانانو په ګډون د دغې ډلې ټول ۹۶ وسله وال وژل شوي دي.

داسلامي دولت یا داعش وسله‌والې ډلې، د ننګرهار ولایت د اچین وسوالۍ د مامندو د اسدخیلو په سیمه کې د دغې ډلې د وسله والو پر مرکزونو د امریکا د پوځ د ټولو ستر بم له استعال څخه نږدې څلور ورځې وروسته، په خپل لومړي غبرګون کې ادعا کړې چې د پنجشنبې د شپې په برید کې دوی ته هیڅ زیان نه دی رسیدلی.

داعش وسله والې ډلې د دغه ستر بم د کارونې په اړه خپل غبرګون د خپلې راډیو "اسلامي خلافت"د تېرې یکشنبې په ماښامنۍ خپرونه کې څرګند کړ.

د یکشنبې د ماښام د راډیو د خپرونو تقریبآ ټوله برخه د امریکا د پوځ له خوا په اچین کې د داعش وسله والو پر مرکزونو خبرونو او رپوټونو ته ځانګړې شوې وه.

د سلطان عزیز اعزام په نومد دغې راډیو یو ویاند د اچین په ولسوالۍ کې د بمونو د مور بم د غورځېدو په تړاو، چې حکومت پکې د ۹۶ داعش جنګیالیو د وژل کېدو دعوه کړې وویل، دغه خبر تشې اوازې دي او زیاته یې کړه چېپه دغه برید کې دې ډلې وسله والو ته هیڅ تلفات نه دي اوښتي.

ویاند د کونړ، پښتونخوا، سوریې او عراق په اړه هم خبرې وکړې او هلته یې د داعش وسله والو د جګړو حال ورکړ.

وروسته یې د داعش له ځینو جګړه مارانو سره خبرې وکړې او د هغه لوی بم په اړه یې د هغوی نظرونه خپاره کړل، هغوی ویل چې هیڅ زیان نه دی ور اوښتی.

وروسته یې د " امیر الحرب" په نوم له یو کس سره چې د خراسان مشر یې باله مرکه وکړه، هغه وویل " زمونږ مجاهدینو ته هیڅ نقصان نه دی رسېدلی".

د راډیو ویاند او داعش نورو غړو په خپلو مرکو کې وویل چې بمبارد یې پر ملګرو نه، بلکېپه یو خالي ځای شوی دی.

دا به ښايي په اچین ولسوالۍ د امریکا لخوا د لوی بم تر غورځېدو وروسته لومړنی غبرګون وي چې داعش وسله وال یې څرګندوي

د ننګرهار ولایت په اچین ولسوالۍ کې د ' بمونو مور' تر غورځولو وروسته داعش وسله والو د خلافت غږ په نوم راډيو کې خپلو تبلیغاتو ته زور ورکړی او د نشراتو ډېره برخه یې د اچین په ولسوالۍ کې د امریکا لوی او خطرناک بمي برید ته ځانکړې کړې ده.

خلافت غږ( ایف ایم راډيو) په (۹۰) فریکونسۍ سهار او ماښام په پښتو ژبې د خپرونو ترڅنګ په دري او اوزبکي ژبو هم خپرونې کوي، چې د ننګرهار ولایت مرکز جلال آباد ښار په ګډون د دې ولایت په ډيرو سیمو کې اوریدل کیږي.

خبریالانو ته ګواښونه

د خلافت غږ راډيو کې رسنیو ته د " شیطاني او غلامو" رسنیو خطاب کیږي او ادعا کوي چې ټولې رسنۍد امریکا په غلامۍ نشرات کوي.

د جلال اباد ښار اوسېدونکی پرویز اصف چې د خلافت غږ راډيو یې اورېدلې وايي:"دا څو ورځې یې نشرات سخت توند کړي دي".

هغه وايي حکومت باید ددغو نشراتو مخه ونیسي که نه نو ډېر خلک به داعش سره د دغې ډلې د همدې تبلغاتو له لارې یو ځای شي.

د ننګرهار د امنیه قوماندانۍ ویاند حضرت حسین مشرقیوال او د اچین ولسوال اسماعېل شینواری وايي چې دوی تر اوسه د داعش راډيو له تازه نشراتو نه دي خبر او نه یې هم تر اوسه اورېدلي دي.

خو د ننګرهار د والي ویاند عطاء الله خوږیاڼی وايي چې داعش راډيو په دې وروستیو کې خپل نشرات یو ځل بیا شروع کړي دي او د حکومت پر ضد پکې تبلیغات کوي.

نوموړی وايي له دغو نشراتو خبر دي چې ان د جلال اباد ښار او لرې پرتو سیمو کې یې هم خپرونې اورېدل کېږي.

هغه دا چاره یوه لویه ستونزه وبلله او ویې ویل " مونږ هڅه کوو چې ددغې راډيو ځای په نښه او ژر یې له منځه یوسو".

که څه هم څو واره وړاندې د داعش راډيو له منځه وړل شوې وه، خو وروسته به یې بیا ځل په همدغې فریکونسۍ خپرونې پیلولې او لا هم ددغې راډيو نشرات دوام لري.

XS
SM
MD
LG