د لاس رسي وړ اتصالات

بهرني جهادیان له ملاعمر نه مخ اړوي


وړاندې، له طالبانو یو شمېر نورو جلا شویو ډلو هم، له داعش سره بیعت کړی و.

د ازبکستان د اسلامي جنیګالیو یوې ډلې ویلي چې د طالبانو مشر ورک دی او له همدې کبله دغه ډله اسلامي دولت ډلې ته بیعت کوي.

ازبک اسلامپالو جنګیالیو په یوې خپرې شوې ویډیو کې اعلان کړی چې لدې وروسته د ازبکستان اسلامي غورځنګ د ملامحمد عمر په مشرۍ د طالبانو د ډلې پر ځاې، په عراق او سوریه کې د اسلامي دولت د ډلې بیعت کوي.

دغه ویډیو چې په خپلواکه توګه تایید شوې نده د سعدالله اورقنجي په نامه یو کس ښيي چې ځان د ازبکستان د اسلامي غورځنګ ویاند بولي. سعدالله اورقنجي وايي دوی په دې خاطر د اسلامي دولت (داعش) د مشر ابوبکر البغدادي بیعت وکړ چې شاوخوا ۱۳ کاله کیږي د طالبانو مشر ملا محمد عمر لادرکه دی. په خپرې شوې ویډيو کې اورقنجي په ازبکي ژبه وايي چې د شریعت له مخې، نور ملاعمر مشر نشي پاتي کیداې.

د ازبکستان اسلامي غورځنګ په ۱۹۹۸ کال کې رامنځته شو او اصلي موخه يې په ازبکستان کې د اسلامي شرعي نظام رامنځته کول دي. دغې ډلې له هماغه پیل نه له افغان طالبانو سره نږدي اړیکي پاللي او په تیرو ۱۳ کلونو کې د ازبکستان د اسلامي غورځنګ جنګیالي د طالبانو سره اوږه په اوږه د نړيوالو او افغان ځواکونه په ضد جګړه کې بوخت دي.

خو ویل کيږي چې د نورو اورپکو وسله والو ډلو په څېر، د ازبکستان د اسلامی غورځنګ ډله هم په څو وړو ډلو ویشل شوې ده او هره ډله په نسبي خپلواکه توګه فعالیت کوي.

په واشنګټن کې د ویلسن په مرکز کې د جنوبي اسیا د امنیتي چارو کارپوه مایکل کوګلمن امریکا غږ ته وویل له اسلامي دولت ډلې سره د ازبکستان د اسلامي غورځنګ یو ځاې کیدل کوم هیښنونکی خبر ندی.

ښاغلي کوګلمن وویل "د ازبکستان د اسلامي غورځنګ په څېر نورې ډلې او آن پخپله د طالبانو په لیکو کې ډیر داسې کسان پیدا کيږي چې ابوبکر البغدادي ته بیعت کوي او له اسلامي دولت ډلې سره یوځاې کيږي."

د ښاغلي کوګلمن په اند په افغانستان، پاکستان او نورو هېوادنو کې اسلامپالې وسله والې ډلې د اسلامي دولت د ډلې تر اغیزې لاندي راغلي او د طالبانو مشران چې پخپله په پټه ژوند کوي، د مشرتوب په ساتلو کې پاتي راغلي.

XS
SM
MD
LG