د لاس رسي وړ اتصالات

کرزی نن شپه افغان ولس ته خپله وروستۍ وینا اوروي


جمور رئیس کرزی او منتخب جمهورریس احمدزی (ارشیف)

جمور رئیس کرزی او منتخب جمهورریس احمدزی (ارشیف)

ټاکل شوې چې جمهور رئیس حامد کرزی به نن شپه اته بجې د خپل دیارلس کلنۍ واکمنۍ په وروستۍ شپه افغان ولس ته د افغانستان د جمهورریس په حیث خپله وروستۍ وینا واوروي.

تراوسه ددغې وینا د محتویاتو په باب څه نه دي ویل شوي خو د جمهور رئیس حامد کرزي د ویاند مرستیال فایق واحدي امریکا غږ ته وویل چې دا وینا به د تولو هغو ملي او نړیوالو رسنیو له لارې د شپې په اتو بجو په یو وخت خپره شي چې افغانستان ته خپرونې کوي.

ټاکل شوې چې جمهور رئیس حامد کرزی به د دوشنبې په ورځ د یولړ ځانګړو مراسمو په ترڅ کې واک د افغانستان نوي منتخب جمهورریس ته وسپاري.

د افغانستان د نوي جمهور رئیس د لوړې مراسمود ترتیباتو لپاره د ګمارل شوي کمیسیون چارواکي وايي چې منتخب جمهور رئیس اشرف غني احمدزی به د دوشنبې په ورځ په ارګ کې د یو لړ ځانګړو مراسمو په ترڅ کې چې ورته نژدې ۱۴۰۰ کورني او بهرني مېلمانه راغوښتل شوي، لوړه وکړي.

دا کمیسیون تمه لري چې تر دوو سوو پورې د بهرنیو هیوادونو د حکومتونو استازي به په دغو مراسمو کې ګډون وکړي.

ټاکل شوې ده چې د لوړې د مراسمو دې غونډې ته به حامد کرزی ،اشرف غني احمدزی او عبدالله عبدلله ویناوې وکړي.

د عبدالله عبدالله د ټیم یو ویاند فضل الرحمان اوریا وایي چې د نوي منتخب جمهور رئیس له خوا د لوړې د پورته کولو وروسته به سبا ته عبدالله عبدالله هم د اجرائیوي ریس په توګه لوړه پورته کړي.

ښاغلي اوریا وویل سبا ته نوی ولسمشر د یو لړ شاندارو مراسمو په لړ کې جمهوري ریاست په مانۍ کې لوړه وکړي او بیا به عبدالله عبدالله د ملي یووالي د حکومت د اجرائیوي ریس په توګه لوړه وکړي.

د افغانستان په اوږد تاریخ کې د لومړی ځل دی چې یو منتخب جمهور رئیس بل منتخب جمهور رئیس ته په سوله ایزه توګه واک سپاري.

د نوي جمهور رئیس د لوړې د پورته کولو د مراسمو له امله د دوشنبې ورځ په کابل کې عمومي رخصتي اعلان شوې ده.

XS
SM
MD
LG