د لاس رسي وړ اتصالات

عطا نور: شمال پخپله ساتلی شو


د بلخ سرپرست والي د جمهوري ریاست بې غوري او ناغیړي د روان حالت او د کندز د سقوط اصلي علت بولي.

د بلخ سرپرست والي د جمهوري ریاست بې غوري او ناغیړي د روان حالت او د کندز د سقوط اصلي علت بولي.

والي عطا محمد نور وايي دی له وړاندې په دې خبر و چې طالبان پر کندز د یو لوی برید پلان لري.

ښاغلي عطا ه وویل چې په همدې خاطر کابل ته ولاړ، ولسمشر غني، اجرایي ریس عبدالله او د امنیت شورا ته یې د دغه خطر په اړه معلومات ورکړل، خو په خبره یې چا پرې غوږ ونه ګراوه.

ښاغلي عطا د کندز د سقوط په غبرګون کې د امریکا غږ اشنا راډیو سره په یوې مرکې کې دا خبرې کولې.

هغه چې اوس په یو کنفرانس کې په دوبۍ کې دی، د جمهوري ریاست بې غوري او ناغیړي د روان حالت او د کندز د سقوط اصلي علت بولي.

ښاغلي عطا خبرداری ورکړ چې شاید د کندز له سقوط وروسته د شمال نور ولایتونه هم تر بل هر وخت ډېر د طالبانو له خطر سره مخامخ شي.

هغه په ټېنګار سره وویل چې جمهوري ریاست باید دغې موضوع ته جدي پام وکړي.

نوموړی وايي چې د بلخ یو شمېر ولسوالۍ هم د وسله والو طالبانو له ګواښ سره مخامخ دي او ده له دغو سیمو څخه د وسله والو طالبانو د شړلو لپاره د عملیاتو اجازه هم غوښتې ده.

عطا محمد نور خبرداری ورکړ که حکومت نوره بې پروایي وکړي، یا د ده په ټکو ځان په خوب واچوي، دی به پخپله د شمالي ولایتونو دفاع ته ورودانګي، خو وضاحت یې ورنکړ چې څنګه او په کوم ځواک سره به له شمال نه دفاع کوي.

XS
SM
MD
LG