د لاس رسي وړ اتصالات

روسیه غواړي له خپلې خاورې افغانستان ته اکمالات پرېږدي


روسیه غواړي له خپلې خاورې افغانستان ته اکمالات پرېږدي
روسیه غواړي له خپلې خاورې افغانستان ته اکمالات پرېږدي

مامورین وايي توقع کیږي چې روسیه به د ناتو تړون ته اجازه ورکړي چې د خپلې خاورې نه افغانستان ته مواد انتقال کړي. دا نوی بدلون د روسیې او ناټو تر منځ په افغانستان کې د همکارئ یو مهم دلیل گڼل کیږي.

کله چې ناټو د روسیې په لاره باندې افغانستان ته د عسکرو لپاره د موادو انتقالول شروع کړي نو د پاکستان په لاره باندې چې ډیره خطر ناکه لاره ده، د ناټو اتکا کمه شي.

په دغه لاره باندې څو څو وارې طالبانو د ناټو پر اکمالاتي کاروانونو باندې حملې کړي دي.

د ناټو د تړون لپاره د روسیې استازي ډېمټري روگوزین نن وویل چې د موافقې له مخې ناټو کولای شي چې یوازی غیر پوځي اکمالات او مواد افغانستان ته د روسیې په خاروه باندې انتقال کړي او د وسلو د انتقالولو اجازه به ونه لري. ښاغلي روگوزېن د روسیې انټرفاکس خبري اژانس ته وویل چې د ناټو ټول اکمالات به یوازې د هوا له لارې په الوتکو کې انتقالیږي.

هغه وویل کله چې د ناټو قواوې د افغانستان نه بیرته راستنیږي نو د روسیې په خاوره باندې یې د وسلو د انتقالولو لپاره په یوه موافقه باندې غور کیږي او دا موافقه به په دې پورې اړه ولري چې د روسیې گمرکات او امنیتي ارگانونه څومره اجازه ورته ورکولای شي.

مسکو وايي غواړي چې په افغانستان کې د ناټو د تړون د قواوو سره خپله همکاري پراخه کړي ځکه چې دواړه یې په دغه هېواد کې یو لړ شریکې حياتي گټې لري.

د روسیې عسکرو د ناټو د قواوو سره یو ځای سږ کال په اکتوبر کې په افغانستان کې د مخدره موادو د له منځه وړلو په عملیاتو کی برخه واخېستله.

د روسیې جمهور رئیس ډېمټری مېډوېډیف به د پرتگال په پایتخت لېزبن کې د ناتو د مشرانو په غونډه کې گډون وکړي چې د بحث مهمه مسله به یې په افغانستان کې د ناټو او روسې همکاري وي.

XS
SM
MD
LG