د پاکستان صدراعظم یوسف رضا ګیلاني د هغه هیواد د پوځ د لوي درستیز( اشفاق کیاني ) د هغي وینا هرکلی کړی چي په کي یې د کودتا امکانات رد کړي دي.
جنرال اشفاق پرویز کیاني پرون د جمعې په ورځ وویل چي هغه آوازې چي وایي د اردو له خوا د ملکي حکومت د نیولو امکانات موجود دی غلطي دي. هغه وویل چي دداسي رپوټونو هدف دادی چي د اصلي مسالو نه د خلکو پام بلي خواته واړوي. هغه وعده وکړه چي اردو به په ملک کي ددیموکراتیک جریان ملاتړ ته دوام ورکړي.
د پاکستان صدراعظم نن خبریالانو ته وویل چي د جنرال کیاني دا تبصره « ددې هیواد په دیموکراتیکو حلقو کي په زیاته اندازه ډیره ښه بلل شوېده » او
« حالات به ښه کړي. »
ښاغلي ګیلاني دا وینا په اسلام آباد کي په یوه کلیسا کي د عیسویانو د اختر یا کریسمیس په اړه د یوه پیغام د اورولو نه وروسته وکړه.
دده حکومت د هغه پټ لیک له کبله تر زیات فشار او انتقادونو لاندي دی، چي څو میاشتي مخکي لیکل شوی او په هغه کي په پاکستان کي د نظامي کودتا کولو د ویري د له منځه وړلو د پاره د امریکا مرسته غوښتل شوې وه.