د لاس رسي وړ اتصالات

د آی اس آی مشر کابل ته ځي


دا به د پاکستان د آی اس آی د مشر په توگه افغانستان ته د نوید مختار لومړی سفر وي

ډگر جنرال نوید مختار د لومړي ځل لپاره پداسې حال کې افغانستان ته ځي چې د کابل او اسلام آباد ترمنځ اړیکې ترینګلې دي.

ټاکل شوی چې د پاکستان د استخباراتي ادارې آی اس آی رئیس د روانې اونۍ په پای کې د خپل افغان سیال سره د خبرو لپاره افغانستان ته لاړ شي چې د دوه اړخیزو اړیکو او د تروریزم ضد مبارزه کې په همکارۍ خبرې وکړي.

د پاکستان د پارلمان د استازو د مجلس رئیس ایاز صادق وایي، د پاکستان د آی اس آی رئیس ډگر جنرال نوید مختار ښایي د دوه اړخیزو اندیښنو تر څنگ د ترهگرو د هغه لست په اړه هم خبرې وکړي چې دواړه اړخونه یې غواړي.

د ښاغلي صادق په مشرۍ یو ١٥ کسیز پارلماني پلاوي کابل ته دوه ورځنی سفر کړی و. ښاغلي صادق ددې سفر وروسته په اسلام آباد کې وویل چې د پاکستان امنیتي مربوطې ادارې به د افغان چارواکو سره په مسایلو باندې بحث وکړي.

اسلام آباد په پاکستان کې د ترهگریزو بریدونو د لړۍ وروسته د فبرورۍ په میاشت کې افغان لورې ته د پاکستاني ترهگرو یو لست وسپاره چې د هغوی په وینا په افغان سرحدي سیمو کې پټ دي. افغان حکومت هم پاکستان ته د هغو ترهگرو یو لست سپارلی چې په افغانستان کې بریدونه کوي.

د پاکستان د پارلمان رئیس وایي د افغانستان رهبرۍ او د افغانستان د پارلمان غړو د پاکستاني پلاوي تود هرکلی کړی دی او د افغاسنتان اجرائیه رئیس د هغه پلاوي ته ډاډ ورکړی چې هغه به په نژدې راتلونکې کې پاکستان ته سفر وکړي.

د افغانستان او پاکستان ترمنځ اړیکې وروسته له هغې نورې هم خړې پړې شوي چې په افغانستان کې سخت دریځو طالبانو وژونکو بریدونو ته زور وکړ او د کابل سره یې د سولې خبرو ته شا کړه.

افغان حکومت وایي په پاکستان کې دننه پټنځایونه له طالبانو سره مرسته کوي چې په افغانستان کې خپلو ترهگریزو فعالیتونو او حملو ته دوام ورکړي.

XS
SM
MD
LG