د امریکا د بهرنیو چارو وزارت د پاکستاني طالبانو د مشر ملا فضل الله نوم د نړیوال تروریزم د پېژندل شویو او مطلوبو کسانو په لست کې ورشامل کړ.
دغه پرېکړه د بهرنیو چارو وزارت د هغه فرمان په اساس شوې، چې ترهګر او د ترهګرو ملاتړي، په نښه کوي.
دا اعلان پاکستان ته د امریکا د بهرنیو چارو د وزیر جان کېري له سفر سره همهاله کیږي.
د بهرنیو چارو وزارت په خپرې شوې اعلامیې کې ویل شوي چې د شوې پرېکړې له مخې به په امریکا کې، امریکا ته راتلوونکې، د امریکا تر کنترول لاندې او د امریکا اړوندې، د ملا فضل الله ټولې پېسې او پانګې کنګل کیږي.
مولانا فضل الله د ۲۰۱۳ کال د نومبر په میاشت کې د پاکستاني طالبانو د بل مشر حکیم الله محسود له وژل کېدو وروسته، د طالبانو مشر وټاکل شو.
اعلامیه وايي امریکا د۲۰۱۰ کال د سپتمبر په لومړۍ نېټه پاکستاني طالبان د یوې نړیوالې ترهګرې او د نړیوالې ترهګرۍ د یوې پېژندل شوې ډلې په توګه وپېژندل.
د پاکستاني طالبانو ډله همدغه راز، د ملګرو ملتونو په هغه لست کې هم شامله ده چې د اعلامیې له مخې، په القاعدې پورې تړلې دي او بندیزونه پرې لګول شوي دي.
څه موده مخکې په پېښور کې پر یو یو پوځي ښوونځي برید مسوولیت هم د ملا فضل الله په مشرۍ طالبانو ومانه، چې په کې لږ تر لږه ۱۴۸ تنه ووژل شول چې ډېر زده کوونکي وو.
دغه ښوونځي له څو اونیو وروسته د دوشنبې په ورځ بېرته پرانیستل شو چې پر نورو چارواکو سربېره، د پاکستان د پوځ لوی درستیز یې هم د پرانیستې غونډې ته ورغلی و.
پاکستاني طالبانو وویل چې په برید کې یې د پوځ زامن او لورګانې وژلي دي.
ملا فضل همدغه راز په ۲۰۱۳ کال کې د یو پاکستاني جنرال ثناالله نیازي په وژلو او په ۲۰۱۲ کال کې د پوهنې پر فعالې ملالې یوسفزۍ برید کې هم تورن دی.
د امریکا د بهرنیو چارو وزارت اعلامیه وايي ملا فضل الله د ۲۰۱۲ کال د جون په میاشت کې د پاکستاني پولیسو پر یوې پوستې د برید او بیا د ۱۷ سرتېرو پر وژلو هم تورن دی.
